މާލޭގައި އަންހެނަކު ރަހީނުކޮށް އަނިޔާކުރި މައްސަލަ އާއި ގުޅިގެން ފުލުހުންގެ ބެލުމުގެ ދަށުގައި ހުރި ށ.މިލަންދޫ ހެޕީ ލޭންޑް، އާދަމް އަތުހަރު މަރުވެއްޖެއެވެ.

ފުލުހުން ބުނީ އޭނާ މަރުވީ އިންދިރާގާނދީ މެމޯރިއަލް ހޮސްޕިޓަލުގައި ފަރުވާދެމުން ދަނިކޮށް ކަމަށެވެ. އޭނާ ނިޔާވީ ހޯމަ ދުވަހުގެ 16:08 އެހާކަށް ހާއިރު ކަމަށް ފުލުހުން ވަނީ އައިޖީއެމްއެޗާއި ހަވާލާދީ ބުނެފައެވެ. އަތުހަރު އަށް އަައިޖީއެމްއެޗްގައި ފަރުވާދީފައިވަނީ ފުލުހުންގެ ބެލުމުގެ ދަށުގައި ދޫނިދޫގައި ހުއްޓާ ރޭގެ ވަގުތެއްގައި އޭނާ ބަންދުގަ ހުރި ޖަލުގައި އޭނާ ދަންޖެހުމާއި ގުޅިގެންނެވެ. އޭނާ ނިޔާވި މައްސަލަ ދިވެހި ފުލުހުންގެ ޚިދުމަތުން ދަނީ ތަހުގީގުކުރަމުންނެވެ. އަދި އޭނާ މަރުވި ސަބަބު ދެނެގަތުމަށް އޮޓޮޕްސީ އެއް ހަދަން ނިންމާފައިވާކަމަށް ފުލުހުން ވަނީ ބުނެފައެވެ. އަދި މި މައްސަލަ އާއި ގުޅިގެން މިނިވަން މުއައްސަސާތަކުން ކުރާ ތަހުގީގަށް ފުރިހަމަ އަށް އެއްބާރުލުން ދޭނެ ކަމަށް ފުލުހުން ވަނީ ބުނެފައެވެ.

މާލޭގައި އަންހެނެއްގެ ކަރުގައި ވަޅި ޖައްސައި ރަހީނު ކުރި މައްސަލައިގައި، އުމުރުން 32 އަހަރުގެ އަތުހަރު ހައްޔަރު ކޮށްފައި ވަނީ ހާދިސާ ހިނގި ސަރަހައްދުން 2024 އޯގަސްޓު 29 ވީ ބުރާސްފަތި ދުވަހުގެ ރޭގެ ވަގުތެއްގަ އެވެ. ރަހީނު ކުރި އަންހެން މީހާ ސަލާމަތް ކުރުމަށް ފުލުހުން ކުރި މަސައްކަތުން އަތުހަރަށް ވަރަށް ބޮޑަށް އަނިޔާވެ، 30 އޯގަސްޓް 2024 ވީ ހުކުރު ދުވަހު އައިޖީއެމްއެޗުގައި ފަރުވާ ދީފައިވެ އެވެ. އަތުހަރަށް އައިޖީއެމްއެޗުގައި ފަރުވާ ދިނުމަށްފަހު، ހުކުރު ދުވަހުގެ ހެނދުނު ވަނީ ކަސްޓޯޑިއަލް ޖަލަށް ގެންގޮސްފަ އެވެ. ނަމަވެސް، އެ ދުވަހުގެ ހަވީރު ހާލު ސީރިއަސް ވުމާއެކު، އައިޖީއެމްއެޗުގައި އަނެއްކާ ވެސް އޭނާ އެޑްމިޓު ކުރި އެވެ. އަދި ހޮނިހިރު ދުވަހުގެ ހެނދުނު އޭނާ ސްޓޭބަލް ވުމާ އެކީ، ފުލުހުންގެ ބެލުމުގެ ދަށަށް އަނެއްކާ ވެސް ގެންދިޔަ އެވެ.