އިންތިޚާބަކާ ނުލައި 12 ރަށެއްގެ އަންހެނުންގެ ކޮމިޓީއަށް މެންބަރުން ކަށަވަރުވެއްޖެ
ވ. ތިނަދޫއަށް 5 މެންބަރުން އިންތިޚާބުކުރާނެ
އިލެކްޝަންސް ކޮމިޝަން
އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަންތަކުގެ ތެރެއިން 12 ރަށެއްގެ ގޮނޑި އިންތިޚާބަކާ ނުލައި ކަށަވަރުވެފައިވާ ކަމަށް އިލެކްޝަންސް ކޮމިޝަނުން ހާމަކޮށްފިއެވެ.
އެ ކޮމިޝަނުން ބުނީ އެ 12 ރަށުގައި ބައި އިލެކްޝަން ނުބާއްވަނީ އެ ރަށްރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީ ބައި-އިލެކްޝަންގައި އެންމެ ފަރާތަކުން ކުރިމަތިލާފައިވާތީ ކަމަށެވެ. އެހެންކަމުން ދެން ބައި-އިލެކްޝަން އޮންނާނީ މ. މުލަކުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ހުސްވެފައިވާ ގޮނޑިއަށް މެންބަރަކު އިންތިޚާބު ކުރުމަށެވެ.
މި މަޤާމަށްކުރިމަތިލީ 2 މީހުންނެވެ. އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަނަށް ހުޅުވާލީ 18 ރަށެއްގެއެވެ. އޭގެ ތެރެއިން 6 ރަށެއްގެ އަންހެނުންގެ ތަރައްޤީގެ ކޮމިޓީ އަށް އެއްވެސް ފަރާތަކުން ކުރިމަތިލާފައެއް ނުވެއެވެ. އޭގެ ތެރޭގައި ހިމެނެނީ އއ. ތޮއްޑޫ، ވ. ތިނަދޫގެ ރ. ރަސްގަތީމު، ބ. ކެންދޫ، މ. ރަތްމަންދޫ އަދި ފ. ބިލެތްދޫއެވެ. އޭގެ ތެރެއިން ވ. ތިނަދޫއަށް 5 މެންބަރުން އިންތިޚާބުކުރާނެއެވެ. އަދި ބާކީ ކޮންމެ ރަށަކަށް އިންތިޚާބު ކުރާނީ 1 މެންބަރެވެ. އެ ރަށްރަށުގެ ހުސްވެފައިވާ މަޤާމުތަކަށް ކުރިމަތިލުމަށް އަލުން އިޢުލާނުކުރާނެއެވެ.
