ހުޅުމާލެ-ފޭސް ތިނަކުން ބިން ލިބުނު މީހުންނަށް ފުށިދިއްގަރުފަޅުން ބިން ދޫކުރުމަށް ނިންމަނީ

ހުޅުމާލެ-ފޭސް ތިނަކުން ބިން ލިބުނު މީހުންނަށް ފުށިދިއްގަރުފަޅުން ބިން ދޫކުރުމަށް ނިންމުމާއި ގުޅޭގޮތުން މަޝްވަރާ ކުރަމުންދާ ކަމަށް އިތުބާރުހުރި ފަރާތަކުން ވިދާޅުވެއްޖެއެވެ.

ރާއްޖެއެމްވީއަށް އިތުބާރުހުރި ފަރާތަކުން ވިދާޅުވީ ފުށިދިއްގަރުފަޅުގެ މަޝްރޫއު ބަޖެޓުގައި ނުހިމެނި ނަމަވެސް މިސަރުކާރުން ނިންމާފައިވަނީ އެމަޝްރޫއު ކުރިއަށް ގެންދިއުމަށެވެ. އަދި ހުޅުމާލެ ފޭސް-ތިނަކުން ބިން ލިބިފައިވާ މީހުންނަށް ފުށިދިއްގަރުފަޅުން ބިން ދޫކުުރުމަށް ނިންފައިވާ ކަމަށާއި، އެބިންތައް ފުށިދިއްގަރުފަޅަށް ބަދަލު ކުރާގޮތަށް ޕްލޭން ކުރުމަށް އަންގާފައިވާ ކަމުގެ މައުލޫމާތު ލިބިފައި ވެއެވެ.

ބުދަ ދުވަހު މިމަޝްރޫއާއި ގުޅޭގޮތުން ދައުރު ނޫހުގައި ބުނެފައިވަނީ ފުށިދިއްގަރުފަޅު ހިއްކުމުގެ މަޝްރޫއު ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާ ހަވާލުކޮށްފައިވާ ކަމަށެވެ.

ސީއެމްސީ ކުންފުންޏަކީ ކުރީގެ ސަރުކާރުން ފެށި ހުޅުމާލޭ-3 ދިޔަނެރުފަޅު އަދި ތިލަފުށިން އިތުރު ބައެއް ހިއްކުން ހިމެނޭ މަޝްރޫއުގެ މަސައްކަތް ވެސް ކުރަމުންދާ ކުންފުންޏެވެ.

ފުށިދިއްގަރުފަޅު ހިއްކަން އާބަންކޯއާ ސީއެމްސީއާ ދެމެދު އެއްބަސްވުމެއްގައި ސޮއިކުރިއިރު، ކ. ގުޅީގެ އިހްތިސޯސުގެ ތެރޭގައި މިހާތަނަށް އޮތް ފުށިދިއްގަރުފަޅު އެ ރަށުގެ އިހްތިސޯސުން ވަނީ ވަކިކޮށްފައެވެ. އަދި ފުށިދިއްގަރުފަޅުން ފުރަތަމަ ހިއްކުމަށް ހަމަޖެހިފައިވަނީ 20 ހެކްޓަރުގެ ބިން ކަމަށް މައުލޫމާތު ލިބެއެވެ.

ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމަށް ހައްލު ގެނައުމުގެ ގޮތުން ހުޅުމާލެ ފޭސް-3 އަކުން 63 ހެކްޓަރުގެ ބިން ހިއްކުމަށް ވަނީ ނިމާފައެވެ. އަދި ބިން ދޫކޮށްފައިވެއެވެ. ފޭސްތަކަކަށް ބަހާލައިގެން މިމަޝްރޫއު ކުރިއަށް ގެންދާއިރު، މިހާތަނަށް ނިމިފައިވަނީ ސައިޓް- އޭގެ ބިން އެއްކޮށް ހިއްކާފައެވެ. އަދި ބީ ހިއްކުމުގެ މަސައްކަތް ފަށައި، މިހާރު ވަނީ ވަގުތީ ގޮތުން މަސައްކަތް ހުއްޓާލާފައެވެ. ހުޅުމާލެ ފޭސް 3 ހިއްކަން ފަށާފައިވަނީ 23 ސެޕްޓެމްބަރު 2023 ގައެވެ. އަލުން މިމަޝްރޫއު ފަށާނެ ވަކި ތާރީޚެއް ވެސް އާބަންކޯއިން ހާމަކޮށްފައިނުވެއެވެ.

ފުށިދިއްގަރުފަޅުގެ މަޝްރޫއާ ގުޅޭގޮތުން އާބަންކޯގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާގޮތް ނުވެފައެވެ.