100 މިލިއަން ޔޫރޯ ލިބޭނަމަ އަރައުހޯ ވިއްކާލަނީ
13 ޑިސެމްބަރު 2023 | ބުދަ 11:08ބަޔާން އަށް ބަދަލުވުމަށް އެކުލަބުގެ ކޯޗާއެކު އަރައުހޯ ވާހަކަ ދެއްކި ކަމަށް ދަނީ ތުހުމަތު ކުރަމުން
ބާސެލޯނާ އަށް ކުޅެމުން އަންނަ ރޮނާލްޑް އަރައުހޯ
100 މިލިއަން ޔޫރޯ ލިބޭނަމަ ބާސެލޯނާގެ ޑިފެންޑަރު ރޮނަލްޑް އަރައުހޯ ވިއްކާލަން މަޝްވަރާ ފަށައިފިކަމަށް ސްޕޭނުގެ ނޫސްތަކުން ބުނަން ފަށައިފި އެވެ.
އަރައުހޯ ގަންނަން މަސައްކަތް ކުރަނީ ޖަރުމަނުގެ ބަޔާން މިއުނިކުންނެވެ. އޭނާ ވަނީ ދާދި ފަހުން ބަޔާންގެ ކޯޗު ތޯމަސް ޓުކެލްއާއެކު މިކަމާމެދު އިތުރު މަޝްވަރާތަކެއް ބާއްވާފައި ކަމަށް ވެސް ސްޕޭންގެ ނޫސްތަކުން ބުނެ އެވެ.
އުރުގުއޭގެ ޑިފެންޑަރު އަރައުހޯ އަކީ ބާސެލޯނާގެ އެންމެ މުހިންމު އެއް ޑިފެންޑަރެވެ. އޭނާ ވިއްކާލަން ބާސެލޯނާއިން ބޭނުންވަނީ އެންމެ ސަބަބަކަށެވެ. އެއީ އެ ކުލަބުގެ މާލީ ހާލަތު ގޯސްވެފައި އޮތުމުން އެކަމުން އަރައިގަތުމަށެވެ.
އަރައުހޯ ހުރީ ބާސެލޯނާގައި ވަރަށް ހަމަޖެހިގެން ކަމަށް އެކުލަބުން ވަނީ ދާދި ފަހުން ބުނެފަ އެވެ. ނަމަވެސް ބަޔާނުން 100 މިލިއަން ޔޫރޯ ހުށަހަޅާނަމަ މިއީ ބާސެލޯނާއިން ދޫކޮށްލާނެ ކަމެއްނޫން ކަމަށް ޖަރުމަނުގެ ނޫސްތަކުން ވެސް ބުނެ އެވެ.
