ޕޮމްޕޭގެ ޖަލު-ބޭކަރީ ކިޔައިދެނީ ކޮން ވާހަކައެއްކަން އެނގޭތަ؟

އިޓަލީވިލާތުގެ ގަދީމީ ރަށެއް ކަމަށްވާ ޕޮމްޕޭއަކީ އިހުގެ ރޯމަނުންގެ އެންމެ ވަރުގަދަ މުއްސަދިން ދިރިއުޅުނު ރަށެކެވެ. އެ މީހުންނަކީ ޖިންސީ އުފާ ހޯދުމާއި، އެއްޖިންސުން ގުޅުން ހިންގުމާއި، ރާބުއިމާއި، ޖުވާކުޅުމާއި، އަޅުންނަށް އިހާނެތިކޮށް ހިތައި މެރުމާއި، ދުނިޔަވީ އެންމެހާ މަޖަލުގައި ހައްދު ފަހަނަޅާފައި ތިބި ބައެކެވެ.

ޕޮމްޕޭގެ އާބާދީއަށް ނިމުން އައީ، ވެސޫވިއަސް އަލިފާންފަރުބަދައިގެ ވަރުގަދަ ގޮވުމާއެކުގައެވެ. ކުޑަކުޑަ ހިނދުކޮޅެއްގެ ތެރޭގައެވެ. ފަރުބަދަތަކުން ފައިބަމުންދިޔަ ވިހަ ގޭހާއި އަޅިތައް ރަށުތެރެއަށް ފައިބައި، ރަށުތެރޭގައި ވައި ބަންދުވިއެވެ. އެމީހުން ތިބިގޮތަށް އެ ހަރަކާތުގައި ތިއްބައި ހަށިގަނޑާއި ފުރާނަ ވަކިވެ ދިޔައީއެވެ. ހަށިތައް މިއަދާ ހަމައަށްވެސް ފެންނަންހުރީ އެމީހުންގެ އެންމެ ފަހު ސިކުންތުގެ ހަރަކާތުގައިވާތީއެވެ. އާސާރީ ތަރިކައިގެ ހޯދުންތަކަށް ޝައުގުވެރިވާ ތަޖުރިބާކާރުން މިހާރުވެސް ދަނީ ޕޮމްޕޭގައި އެކި ކަހަލަ ދިރާސާތައްކޮށް، ތަފާތު އެކިކަހަލަ ހޯދުންތައް ހޯދަމުންނެވެ. ދޭތެރެދޭތެރެއިން، އެ މަންޒަރުތައް، ބައިނަލްއަގުވާމީ މުޖުތަމައާވެސް ހިއްސާކުރެއެވެ.

މިފަހަރުވެސް ޕޮމްޕޭއިން ފެނުނީ އާދައިގެ ތަނެއް ނޫނެވެ. ޕޮމްޕޭއިން މި ފަހަރު ފެނުނީ ޖަލު-ބޭކަރީއެކެވެ. އެ ބޭކަރީގައި މަސައްކަތްކުރަމުން ދިޔަ މީހުން އެ މަސައްކަތް ކުރަމުން ދިޔައީ އަޅުންގެ ގޮތުގައެވެ. ގޮވާން ހިމުންކުރުމުގެ މަސައްކަތުގައި އެމީހުން ބޭކަރީގައި އުޅުނީ ގައިދީންގެ ގޮތުގައެވެ. އެ މަސައްކަތުގައި ހިމާރުތަކެއްވެސް ބައިވެރިކޮށްފައި ވާއިރު، އެ ހިމާރުތައްވެސް ގެންގުޅެފައި ހުރީ އެފަދަ ގޮތަކަށެވެ.

ޕޮމްޕޭގެ އާސާރުތައް ބަލައި ހޯދަމުން ދަނިކޮށް މި ފެނުނު ޖަލު-ބޭކަރީއަކީ ކުޑަކުޑަ ކޮޓަރިގަނޑެއް ކަހަލަ ތަނެކެވެ. ބޭރުތެރޭގެ އެއްވެސް މަންޒަރެއް އެ ކޮޓަރީގެ އެތެރެއަކަށް ނުފެނެއެވެ. އިންތިހާއަށް އުސްކޮށް ރާނާފައިވާ ފާރުގެ ވަރަށް މަތީގައި، ދަގަނޑު ތޭރި ޖެހި، ސައިޒުގެގޮތުން މާ ބޮޑެތި ނޫން ކުޑަދޮރުތަކެއް ހުއްޓެވެ. އެއީ ހަމަ އެކަނި އަލިކުރުމުގެ ބޭނުމަށް ހުރި ކުޑަދޮރުތަކެކެވެ. ޕާން ފިހުމަށް ބޭނުންވާ ގޮވާން މުގުރައި ތައްޔާރުކުރުމަށްޓަކައި އެ ކޮޓަރީގެ ތެރޭގައި އަޅުންނާއި ހިމާރުތައް ބުރުޖަހައި އުޅުނެވެ.

އަލިފާން ފަރުބަދައިން ފައިބައިގެން އަންނަ ދިޔާ ހިލައިގެ އަލިފާން ވައިގެ ސަތަހައަށް ހުޅުވި، ގަނޑުވެފައިވާ ހިލައިން ތަޅުމުގައި ވަށް ބުރެއްގެ ފަޅި ބައްޓަމަށް ކަނޑާފައިވާ ކެނޑުންތަކެއް ހުއްޓެވެ. އެއީ ޖަނަވާރުތައް ކަހާލައިގެން ވެއްޓުނަނުދިނުމަށް ކޮށްފައިވާ ކަމެކެވެ. ހަމަ އެއާއެކު އެ ފަޅި ބުރުތަކުން، ރާސްތާވެސް ފާހަގަ ކޮށްދެއެވެ.

ވެސުވިއަސް އަލިފާންފަދަރުބަދަ ގޮވި ވަރުގަދަ ހާދިސާ ހިނގިއިރު ޕޮމްޕޭގައި ގާތްގަނޑަކަށް 13000އްހާ މީހުން ދިރިއުޅެމުން ދިޔައެވެ. އެތައް އެޓަމް ބޮމެއް ގޮވުމާ ދާދި އެއްވަރުގެ ވަރުގަދަ ގޮވުމަކުން ވެސުވިއަސް އަލިފާންފަރުބަދަ ގޮވައި، ދުމާއި އަޅިއާއި ހިލަތައް ބޭރުވަމުން ދިޔައެވެ. ޕޮމްޕޭގެ އޭރުގެ މަންޒަރުތައް މިއަދުވެސް ހަމަ އެގޮތުގައި ފެންނަން ހުރިއިރު، އެ މަންޒަރުތަކާއި އެ ވާހަކަތައް އަޑުއެހުމަށް އެތައް ބަޔަކު ސަމާލުކަން ދެއެވެ.