ގްރޭޑް 10. 11، 12 ގައި ކިޔަވާ ދަރިވަރުންނާއި ސްކޫލް ނިންމާފައިވާ ދަރިވަރުންނަށް އިމާމުވެ ހުކުރު ނަމާދު ކުރުމުގެ ހުއްދައަށް އެދުމުގެ ފުރުސަތު އިސްލާމިކް މިނިސްޓްރީން ހުޅުވާލައިފިއެވެ.

އެ މިނިސްޓްރީން ބުނެފައިވާ ގޮތުގައި މި ފުރުސަތު ހުޅުވާލާފައިވަނީ ތަޖުވީދުގެ ހަމަތަކާ އެއްގޮތަށް ރީތިކޮށް ޤުރުއާން ކިޔަވައި، ނަމާދުގެ ފިޤުހުގެ ބައިތަކަށް އަހުލުވެރިވެފައިވާ ދަރިވަރުންނަށް ކަމަށެވެ. މި ފުރުސަތު ރާއްޖޭގެ ހުރިހާ ރަށެއްގެ ދަރިވަރުންނަށް ވެސް ވަނީ ހުޅުވާލާފައެވެ.

އިމާމުވެ ހުކުރު ނަމާދު ކުރަން ޝައުގުވެރިވާ ދަރިވަރުންނަށް މިހާރު އޮންލައިން ފޯމު (https://forms.office.com/r/Cy6ksK5MGg) މެދުވެރިކޮށް އެކަމަށް އެދި ހުށަހެޅޭނެއެވެ. މި ފުރުސަތު ހުޅުވާލާފައިވަނީ 29 ފެބްރުއަރީ 2024 ވާ ބުރާސްފަތި ދުވަހުގެ މެންދުރު 2:00 އާ ހަމައަށެވެ.

އިސްލާމިކް މިނިސްޓްރީން ބުނެފައިވާ ގޮތުގައި ފޯމާއެކު ކޮންމެ ދަރިވަރަކުވެސް އައިޑީ ކާޑު ކޮޕީއާއި ތައުލީމީ ސެޓްފިކެޓްތަކުގެ ކޮޕީ އާއި ސްކޫލުގައި އުޅޭނަމަ އެކަމުގެ ލިޔުމާއި 18 އަހަރުން ދަށުގެ ކުދިން ބެލެނިވެރިޔާގެ އިއުތިރާޒެއް ނެތްކަމުގެ ލިޔުން ހުށަހަޅަން ޖެހޭނެއެވެ.