ރޯދަ ވީއްލުމެއް ދިނުމަކީ ރޯދަވެރިއާއަށް ލިބޭ ދަރުމަ އުނިވުމެއް ނުވާ ގޮތަށް އެ ރޯދަ ހިފިމީހާއަށް ލިބޭ ފަދަ ދަރުމަ ތިމާއަށްލިބިގެންދާ ކަމެއް ކަމަށް ހުކުރު ޚުތުބާގައި ބުނެފިއެވެ.
މިއަހަރު ރަމަޟާންމަހުގެ ފުރަތަމަ ހުކުރު ޚުތުބާގެ މައުޟޫއަކީ "ރަމަޟާން މަހަކީ ނަރަކައިން މުއްތިކުރެއްވުމުގެ މައްސަރު" އެވެ. ރަމަޟާން މަހުގައި ރޯދަ ހިފާ މީހުންނަށް ގިނަ ގުނަ ނިއުމަތްތައް ލައްވާފައިވާ ކަމަށާއި އެ ނިއުމަތްތައް ލައްވާފައި ވަނީ ﷲ ގެ އަޅުތަކުން ނަރަކައިން މުއްތިކުރެއްވުމަށް ކަމަށް ޚުތުބާގައި ބުނެފައި ވެއެވެ.
ޚުތުބާގައި ވަނީ ހާއްސަކޮށް ރަމަޟާންމަހުގައި ދީލަތިކަން އިސްކުރުމަށް ގޮވާލައްވާފައެވެ. ރަމަޟާން މަސް އަޅުގަނޑުމެންގެ ގާތަށް އައީ ޝަހުވަތްތަކާއި ދުރުހެލިވުމަށް ތަރުބިއްޔަތު ނިންމުމަށްކަމަށާއި ސުވަރުގެ ހޯދުމަށް އެދޭމީހާ ހަރާމް ކަންތައްތަކުންނާއި، މީހުންގެ އަބުރަށް އަރައިގަތުމުންނާއި، މީސްތަކުންފެ މުދާ ފޭރިގަތުމުން ނަފްސުތައް މިނިވަން ކުރެއްވުމަށް ޚުތުބާގައި ވަނީ ގޮވާލައްވާފައެވެ.
ރަމަޟާންމަހުގެ ރޯދަތައް ގަބޫލުކުރައްވަނީ ފަރުޟު ފަސްނަމާދަށް ޚާއްސަކޮށް ޖަމާއަތުގައި ކުރުމަށް އިސްކަންދީގެން ކަމަށްވާއިރު، ޖަމާއަތުގައި ސާޅިސް ދުވަހު ނަމާދު ކުރި މީހާއަށް ދެބަރަކާތް ލިޔުއްވާ ކަމަށް ރަސޫލާގެ ހަދީސް ފުޅުން ވެސްވާ ކަމަށް ޚުތުބާގައި ވެއެވެ. ނަރަކައިން ސަލާމަތް ވުމައްޓަކައި ނަމާދުގެ ފަހުގައި އައްތަހިޔާތުގައި ދުއާކުރުމަށާއި ﷲ އަށް އީމާންވެތިބެ އެކަލާންގެ ވަޖްހަފުޅު އެދިގެން ރަމަޟާން މަހުގައި ފަރުޟު ކުރައްވާފއިވާ ރޯދަތައް ހިފުމަށް ހުކުރު ޚުތުބާގައި ވަނީ ގޮވާލާފައެވެ.
މީގެ އިތުރުން ރޯދަމަހަކީ އިސްލާހުވުމަށް ލިބިގެންވާ ރަނުގެ ފުރުސަތެއް ކަމަށާއި އެ ފުރުސަތުގެ ބޭނުން ރަނގަޅު ގޮތުގައި ހިފުމަށް ވަނީ ގޮވާލައްވާފައެވެ.
