މުންދު ޔޫއޭއީއަށް، އިރުތިޝާމް ޔޫކޭ އަށް އަދި އދ އަށް އަލީ ނަސީރު
މި މައްސަލަ ދިރާސާކުރުމަށް ފޮނުވާފައިވަނީ މަޖިލީހުގެ ހާރިޖީ ގުޅުންތަކުގެ ކޮމިޓީއަށް
ތިން ގައުމަކަށް އައްޔަންކުރައްވާ ސަފީރުން
3 ޤައުމަކަށް ކަނޑައަޅުއްވާ ސަފީރުންނަށް ރުހުން ހޯއްދެވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޖިލީހަށް ނަންތައް ފޮނުއްވައިފިއެވެ.
ރައީސް ޑރ. މުހައްމަދު މުއިއްޒު މި މަހު ވަނީ ތިން ސަފީރަކު އައްޔަން ކުރެއްވުމަށް މަޖިލީހުން ރުހުން ހޯދަން އެދި ފޮނުއްވާފައެވެ. އެއީ ޔުނައިޓެޑް އަރަބް އެމިރޭޓްސް، ޔޫއޭއީ ސަފީރުކަމަށް މ. ކޮތަންމާގެ، މުހައްމަދު ހުސެއިން ޝަރީފް، އިނގިރޭސިވިލާތުގައި ހުންނަވާ ރާއްޖޭގެ ސަފީރުކަމަށް ހ. އޯކިޑް، ޑރ. އިރުތިޝާމް އާދަމް، އދ ގައި ހުންނަވާ ރާއްޖޭގެ ދާއިމީ މަންދޫބަކަށް ގދ. ގައްދޫ ބެންހާގޭ އަލީ ނަސީރު މުހައްމަދުއެވެ.
މުހައްމަދު ހުސައިން ޝަރީފު މީގެ ކުރިން ވަނީ ލަންކާގައި ހުންނަވާ ރާއްޖޭގެ ސަފީރުކަމާއި ރައީސް އޮފީހުގެ ވަޒީރުކަމާއި ޔޫތު މިނިސްޓަރުކަމާއި ރައީސް އޮފީހުގެ ތަރުޖަމާނުކަން ކުރައްވާފައެވެ. މިވަގުތު އޭނާ ހުންނެވީ ފޮރިން މިނިސްޓްރީގައި އެމްބެސެޑާ އެޓް ލާޖުގެ މަގާމުގައެވެ.
އިރުތިޝާމްވަނީ ޔޫއެންގެ ސަފީރުކަމާއި، ސްވިޓްޒަލަންޑަށް ރާއްޖެއިން ކަނޑައަޅާ ސަފީރު ކަމާއި، ވޯލްޑް ޓްރޭޑް އޯގަނައިޒޭޝަނަށް ރާއްޖެއިން ކަނޑައަޅާ މަންދޫބުކަން ކުރައްވާފައެވެ. އަދި އޭނާ ވަނީ ރައީސް ޔާމީންގެ ވެރިކަމުގައި ހެލްތު މިނިސްޓަރު ކަމާއި ޔޫތު މިނިސްޓަރުކަން ކުރައްވާފައެވެ.
ޑރ. އަލީ ނަސީރު މުހައްމަދު ވަނީ ޕާމަނަންޓް ސެކެރެޓްރީކަމާއި ސަފީރުކަން ކުރައްވާފައެވެ. އަދި ޑރ. އަލީ ނަސީރު މިވަގުތު ހުންނެވީ ފޮރިން މިނިސްޓްރީގައި އެމްބެސެޑާ އެޓް ލާޖުގެ މަގާމުގައެވެ.
މަޖިލީހުގެ ތަޅުމަށް މިއަދު މިބޭފުޅުންގެ ނަންތައް ހުށަހެޅުމުން މި މައްސަލަ ދިރާސާކުރުމަށް ފޮނުވާފައިވަނީ މަޖިލީހުގެ ހާރިޖީ ގުޅުންތަކުގެ ކޮމިޓީއަށެވެ.
