ސްޓަޓްގާޓް ކައިރިން ލެވަކޫސަން ސަލާމަތްކޮށްދިނީ ވާޓްޒް

ޖަރުމަނު ލީގުގައި ބަޔާ ލެވަކޫސަން އިން ސްޓަޓްގާޓާ ދެކޮޅަށް ކުޅުނު މެޗު އެއްވަރުވެގެން ނިމިއްޖެއެވެ.

ލީގުގައި އާދީއްތަ ދުވަހުގެ ރޭ ސްޓަޓްގާޓްގެ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މިއީ މި ސީޒަންގެ ޖަރުމަނު ލީގުގައި މޮޅަށް ކުޅެމުން އަންނަ ލެވަކޫސަން އިން އެއްވަރުވެގެން ނިންމާލި ތިން ވަނަ މެޗެވެ. 11 މެޗުން އެ ޓީމު މޮޅުވެފައިވާއިރު، މިހާތަނަށް ޖަރުމަނު ލީގުގައި ބަލި ނުވެ އޮތް ހަމައެކަނި ޓީމަކީ ވެސް ލެވަކޫސަންއެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ސްޓަޓްގާޓް އިންނެވެ. މެޗުގެ ފުރަތަމަ ހާފުގެ 40 ވަނަ މިނެޓުގައި އެ ޓީމަށް ލީޑު ނަގައިދިނީ މިޑްފީލްޑަރު ކްރިސް ފުރިޗްއެވެ. އޭނާ އެ ލަނޑު ޖެހީ ޔޮޝާ ވެގްނޮމަން ތަނަވަސްކޮށްދިން ފުރުސަތެއްގައެވެ. މެޗުގައި ލެވަކޫސަން އިން ވަނީ ލަނޑު ޖެހުމަށް ފުރުސަތުތަކެއް ތަނަވަސްކޮށްފައެވެ. މެޗުގެ ނަތީޖާ ހަމަހަމަކުރުމަށް އެ ޓީމުން ކުރި މަސައްކަތް ކާމިޔާބުވީ ދެ ވަނަ ހާފުގައެވެ. ދެ ވަނަ ހާފު ފަށައިގެން ދެ ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ފްލޯރިއަން ވާޓްޒްއެވެ. އޭނާ ލަނޑު ޖެހީ ވިކްޓޯ ބޮނިފޭސް ތަނަވަސްކޮށްދިން ފުރުސަތަކުންނެވެ.

މޮޅާއެކު ލެވަކޫސަން އޮތީ ވެސް ލީގު ތާވަލްގެ އެއް ވަނައިގައެވެ. އެއީ މިހާތަނަށް ކުޅުނު 14 މެޗުން 36 ޕޮއިންޓާ އެކުއެވެ. ލެވަކޫސަނަށް ވުރެ އެއް މެޗު މަދުން ކުޅެގެން ދެ ވަނައިގައި އޮތް އެންމެ ފަހުގެ ޗެމްޕިއަން ބަޔާން މިއުނިކަށް ލިބެނީ 32 ޕޮއިންޓެވެ. ލެވަކޫސަނާ އެއްވަރުވެ، ލިބުނު އެއް ޕޮއިންޓާއެކު ސްޓަޓްގާޓް އޮތީ 31 ޕޮއިންޓާއެކު ތިން ވަނައިގައެވެ.