އިނގިރޭސި ޕްރިމިއާ ލީގު
ހަވާޓްޒްގެ ދެ ލަނޑުން ޗެލްސީއަށް މޮޅެއް
 
ފުލަމް އަތުން ޗެލްސީ މޮޅުވީ 2-0 ގެ ނަތީޖާއަކުން
 
ތާވަލުގެ ހަތަރުވަނައިގައި ޗެލްސީ އޮތީ 61 ޕޮއިންޓާއެކު
ކ. މާލެ |
ޗެލްސީ އާއި ފުލަމް ބައްދަލުކުރި މެޗުގެ ތެރެއިން: މި މެޗުން ޗެލްސީ މޮޅުވީ 2-0 ން
ގެޓީ އިމޭޖަސް

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުން ފުލަމް ބަލިކޮށް ޗެލްސީން ލީގު ތާވަލުގެ ހަތަރުވަނައިގައި ހަމަޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ 2-0 ގެ ނަތީޖާއަކުންނެވެ.

މި މެޗު ފަށައިގެން ޗެލްސީން ފުލަމުގެ ގޯލަށް ނުރައްކާކުރިއިރު، މެޗުގެ 10 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މޭސަން މައުންޓުގެ އެހީއާއެކު މި ލަނޑު އެޓީމަށް ކާމިޔާބުކޮށްދިނީ ޒުވާން ތަރި ކައި ހަވާޓްޒްއެވެ. މި ލަނޑަށްފަހުވެސް ފުރަތަމަ ހާފުގައި ޗެލްސީއަށް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ. އެގޮތުން ޗެލްސީގެ ޓީމޯ ވާނާއަށް ވަނީ ލީޑު ފުޅާކުރުމަށް ރަނގަޅު ފުރުސަތު ލިބި ބޭކާރުވެފައެވެ.

މި ހާފުގައި ފުލަމުން އުފެއްދި އެންމެ ނުރައްކާތެރި ހަމަލާ މެޗުގެ 21 ވަނަ މިނެޓުގައި ފޮނުވާލާފައިވަނީ އެ ޓީމުގެ ބޮބީ ރެއިޑެވެ. އެކަމަކު ހުހަށްހުރެ އޭނާ ފޮނުވާލި ބޯޅަ ޗެލްސީގެ ޑިފެންޑަރުން ވަނީ ހުއްޓުވާފައެވެ.

އެއާއެކު މެޗުގެ ދެވަނަ ހާފު ފަށައިގެން ހަތަރުވަނަ މިނެޓުގައި ޗެލްސީން ވަނީ ލީޑު ފުޅާކޮށްފައެވެ. ވާނާގެ އެހީއާއެކު މި ލަނޑުވެސް އެ ޓީމަށް ކާމިޔާބުކޮށްދިނީ ހަވާޓްޒްއެވެ. އަދި އެ ލަނޑަށްފަހުވެސް ޗެލްސީއަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ.

މި މޮޅާއެކު ތާވަލުގެ ހަތަރުވަނައިގައި ޗެލްސީ އޮތީ ކުޅުނު 34 މެޗުން 61 ޕޮއިންޓް ހޯދައިގެންނެވެ. ފަސްވަނައިގައި އޮތް ވެސްޓް ހޭމް ޔުނައިޓެޑަށް ލިބިފައިވަނީ 33 މެޗުން 55 ޕޮއިންޓެވެ. އަދި ހަވަނައިގައި އޮތް އެންމެ ފަހުގެ ޗެމްޕިއަން ލިވަޕޫލަށް 33 މެޗުން 54 ޕޮއިންޓް ލިބިފައިވާއިރު، ހަތްވަނައިގައި އޮތް ޓޮޓެންހަމް ހޮޓްސްޕާއަށް ވަނީ 33 މެޗުން 53 ޕޮއިންޓް ލިބިފައެވެ. މީގެ އިތުރުން ޗެލްސީ އަތުން ބަލިވި ފުލަމް އޮތީ ތާވަލުގެ ފުލުން ތިންވަނައިގައި 34 މެޗުން 27 ޕޮއިންޓާއެކުއެވެ.

އެންމެ ފަހުން އަޕްޑޭޓް ކުރީ: 2 ހަފްތާ ކުރިން
ރިވިއު ކުރީ: އިސްމާޢީލް ޝާހް
0%
އަންތަރީސް ވެއްޖެ
0%
އުފާ ވެއްޖެ
0%
ދެރަ ވެއްޖެ
0%
ރުޅި ގަދަ ވެއްޖެ
0%
މޮޔަވެއްޖެ
0%
ލިޔުން ރަނގަޅު
ކޮމެންޓް