ޖަރުމަން ކަޕްގެ ފައިނަލަށް ބަޔާން މިއުނިކާއި ބަޔާ ލެވަކޫސަން ދަތުރުކޮށްފިއެވެ.
އެންމެ ފަހުގެ ޗެމްޕިއަންކަން ބަޔާން ފައިނަލުން ޖާގަ ހޯދީ ބުދަ ދުވަހުގެރޭ ކުޅުނު ސެމީފައިނަލް ދެވަނަ މެޗުގައި އެއިންޓްރެކްޓް ފްރެންކްފަޓް އަތުން 2-1 ން މޮޅުވެގެންނެވެ.
ބަޔާންގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުން ވެސް ރަނގަޅު ކުޅުމެއް ފެނިގެންދިޔައެވެ. މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ބަޔާނުންނެވެ. މެޗު ފަށައިގެން 14 ވަނަ މިނެޓުގައި ތޯމަސް މުލާގެ އެހީއާއެކު ބަޔާނަށް ލީޑު ނަގައިދިނީ އިވާން ޕެރިސިޗްއެވެ.
މެޗުގައި ދެޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ފްރެކްފަޓް އިން ވަނީ މެޗުގެ 69 ވަނަ މިނެޓުގައި ނަތީޖާ އެއްވަރުކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޑެނީ ޑަ ކޮސްޓާއެވެ. އެކަމަކު އޭގެ ފަސް މިނެޓު ފަހުން ބަޔާނުން ވަނީ އަނެއްކާވެސް ލީޑު ނަގާފައެވެ. ޖޯޝުއާ ކިމިޗްގެ އެހީއާއެކު ބަޔާނަށް ދެވަނަ ފަހަރަށް ލީޑު ނަގައިދިނީ ފޯވާޑް ރޮބަޓް ލެވަންޑޯސްކީއެވެ.
މީގެ އިތުރުން މި މުބާރަތުގެ ފައިނަލުން ލެވަކޫސަން ޖާގަ ހޯދީ އަންގާރަ ދުވަހުގެރޭ ކުޅުނު ސެމީފައިނަލް ފުރަތަމަ މެޗުގައި ޖަރުމަންގެ ހަތަރުވަނަ ޑިވިޝަނުގައި ވާދަކުރަމުން އަންނަ އެފްސީ ސާބްރުކަން އަތުން 3-0 ން މޮޅުވެގެންނެވެ.
ރަށުން ބޭރުގައި ކުޅުނު މި މެޗުގައި ލެވަކޫސަންގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ 11 ވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މޫސާ ޑިއާބީއެވެ.
މެޗުގެ 19 ވަނަ މިނެޓުގައި ލޫކަސް އަލާރިއޯގެ ލަނޑުން ލެވަކޫސަނުން ލީޑު ފުޅާކުރިއިރު، އެ ޓީމުގެ ތިންވަނަ ލަނޑު 58 ވަނަ މިނެޓުގައި ކާމިޔާބުކޮށްދިނީ ކަރީމް ބެލަރަބީއެވެ.
ޖަރުމަން ކަޕްގެ ސެމީފައިނަލް މެޗުތައް އަންގާރަ ދުވަހުގެރެ އާއި ބުދަ ދުވަހުގެރޭ ކުޅުނު އިރު، މީގެ ކުރިން މި މެޗުތައް ކުޅެން ތާވަލުކޮށްފައި އޮތީ އޭޕްރީލް މަހުގެ 21 ވަނަ ދުވަހަށެވެ.
ކޮރޯނާވައިރަސް (ކޮވިޑް-19) އާ ގުޅިގެން މާޗު މަހުން ފެށިގެން ޖަރުމަންގައި ފުޓްބޯޅަ ހަރަކާތްތައް ހުއްޓާލާފައި އޮތުމަށްފަހު، އަލުން ފުޓްބޯޅަ މުބާރާތްތައް ޖަރުމަންގައި ފެށީ މިދިޔަ މެއި މަހުގެ 16 ވަނަ ދުވަހެވެ.
