ފާގަސަންގެ ކައިރިން ގިނަ ފިލާވަޅުތަކެއް ދަސްވި: ރޮނާލްޑޯ

ފާގަސަންގެ ކައިރިން މުހިންމު ގިނަ ފިލާވަޅުތަކެއް ދަސްވިކަމަށް ދުނިޔޭގެ އެންމެ މޮޅު ކުޅުންތެރިޔާގެ މަގާމު ފަސް ފަހަރު ހޯދައިފައިވާ ކްރިސްޓިއާނޯ ރޮނާލްޑޯ ބުނެފިއެވެ.

މީޑިއާއަށް ދިން އިންޓަރވިއުއެއްގައި އޭނާ ބުނީ އޭނާ މިއަދު އާދެވިފައިހުރި ހިސާބަށް އާދެވުމުގައި ފާގަސަންގެ ހިއްސާ ބޮޑު ކަމަށާއި ފާގަސަންގެ އެހީ އާއި ނުލާ މިހާ ހިސާބަށް ނާދެވޭނެ ކަމަށެވެ.

ފާގަސަން އަކީ ފުޓުބޯޅައިގައި އޭނާގެ ބައްޕަ ކަމަށް ބުނަމުން ރޮނާލްޑޯ ބުނީ ފާގަސަންގެ ކައިރިން އޭނާ ވަރަށް ބައިވަރު އެއްޗެހި ދަސްކުރި ކަމަށާއި ފާގަސަން ބުނާގޮތް ހަދައިގެން އުޅުމުގެ ނަތީޖާ މިއަދު ފެންނަ ކަމަށެވެ. އުމުރުން އެހާ ހަގު އުމުރުގައި ފާގަސަން ކަހަލަ ކޯޗަކާއިއެކު މަސައްކަތް ކުރަން ލިބުމުން އޭގެ ނަތީޖާ ފޮނި ކަމަށްވެސް ރޮނާލްޑޯ ބުންޏެވެ.

ފާގަސަން އޭނާ އަށް ކުރާ އިތުބާރު އަދިވެސް ހަމަ އެގޮތުގައި އޮތް ކަމަށާއި އަބަދުވެސް ފާގަސަންގެ ލަފާ އޭނާ ހޯދަމުންދާ ކަމަށް ވެސް ރޮނާލްޑޯ ބުންޏެވެ.

ރޮނާލްޑޯ ވިދާލީ ފާގަސަންގެ ކޯޗު ކަމުގެ ދަށުގައި އިންގްލޭންޑްގެ މެންޗެސްޓާ ޔުނައިޓެޑަށް ކުޅުނު ދުވަސް ވަރެވެ. ޕޯޗުގަލްގެ ސްޕޯޓިން ލިޒްބަން އިން ކެރިޔަރުފެށި ރޮނާލްޑޯ ވަނީ މެންޗެސްޓާ ޔުނައިޓެޑަށް ކުޅެ ގިނަ ކާމިޔާބީތަކެއް ހޯދާފައެވެ. ޔުނައިޓެޑުން ރޮނާލްޑޯ ބަދަލުވީ ރެއާލް އަށެވެ. އޭނާ އަކީ ރެއާލްގެ ތާރީހުގައިވެސް އެންމެ ގިނަލަނޑު ޖަހައިދިން ކުޅުންތެރިޔާއަށް ވާއިރު، އޭނާ ވަނީ އެޓީމަށް ގިނަ ކާމިޔާބުތަކެއް ހޯދައިދީފައެވެ.

ރެއާލްއާއެކު ހަތަރު ޗެމްޕިއަންސް ލީގު ހޯދާފައިވާ ރޮނާލްޑޯ ވަނީ އެޓީމާއެކު ތިން ކްލަބް ވޯލްޑް ކަޕް އަދި ދެ ލީގު ތަށިވެސް ކާމިޔާބުކޮށްފައެވެ. އޭނާ ވަނީ އެޓީމަށް ކުޅުނު 438 މެޗުގައި 450 ލަނޑު ކާމިޔާބުކޮށްފައެވެ.

ޔުވެންޓަސްއަށް ބަދަލުވެ ރޮނާލްޑޯ ވަނީ މިހާތަނަށް އެޓީމަށް ކުޅުނު 38 މެޗުގައި 26 ލަނޑު ކާމިޔާބުކޮށް، އިޓާލިއަން ސުޕަކަޕްވެސް އެޓީމާއެކު ކާމިޔާބުކޮށްފައެވެ.

ދުނިޔޭގެ މޮޅު ކުޅުންތެރިޔާގެ މަގާމު ފަސް ފަހަރު ހޯދާފައވާ ރޮނާލްޑޯ ވަނީ ޕޯޗުގަލް ގައުމީ ޓީމަށް ކުޅުނު 156 މެޗުގައި 85 ލަނޑު ކާމިޔާބުކޮށްފައެވެ. އޭނާ ވަނީ 2016 ވަނަ އަހަރު ޔޫރޯވެސް އެޓީމާއެކު ހޯދާފައެވެ.