ލެވަކޫސަން ބަލިކޮށް ޗެމްޕިއަންކަން ހޯދުމާ ގާތަށް ބަޔާން ޖެހިލައިފި

ބަޔާ ލެވަކޫސަން ބަލިކޮށް، ޖެހިޖެހިގެން އަށްވަނަ ފަހަރަށް ޖަރުމަން ލީގުގެ ޗެމްޕިއަންކަން ހޯދުމާ ގާތަށް ބަޔާން މިއުނިކް ޖެހިލައިފި އެވެ.

ހޮނިހިރު ދުވަހުގެރޭ ރަށުން ބޭރުގައި ބަޔާ ލެވަކޫސަންއާ ދެކޮޅަށް ކުޅުނު މެޗުން ބަޔާން މޮޅުވީ 4-2 ގެ ނަތީޖާއަކުންނެވެ. މި މެޗުގެ ވަރަށް ކުރީކޮޅު ލެވަކޫސަން އިން ވަނީ ލީޑު ނަގާފައެވެ. މެޗުގެ 10 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ލޫކަސް އަލާރިއޯ އެވެ. އެކަމަކު އޭގެ ފަހުން ބަޔާނުން މެޗުގައި މޮޅު ކުޅުމެއް ދެއްކިއިރު، މެޗުގެ 27 ވަނަ މިނެޓުގައި ކިންގްސްލީ ކޯމަންގެ ލަނޑާއެކު ބަޔާނުން ވަނީ ނަތީޖާ އެއްވަރު ކޮށްފައެވެ.

އަދި ފުރަތަމަ ހާފު ނިމުމުގެ ކުރިން ބަޔާނުން ވަނީ އެ ޓީމުގެ ކޮޅަށް ނަތީޖާ އަނބުރާލާފައެވެ. ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް ތޯމަސް މުލާގެ އެހީއާއެކު ބަޔާނަށް ލީޑު ނަގައިދިނީ ލެއޯން ގޮރެޓްޒްކާ އެވެ. އަދި ފުރަތަމަ ހާފުގެ އިތުރު ވަގުތުގައި ސާޖް ގްނަބްރީ ވަނީ ބަޔާނަށް ލީޑު ފުޅާކޮށްދީފައެވެ.

ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 66 ވަނަ މިނެޓުގައި ބަޔާނުން ވަނީ އެ ޓީމުގެ ހަތަރުވަނަ ލަނޑު ކާމިޔާބުކޮށްފައެވެ. މުލާގެ އެހީއާއެކު މި ލަނޑު ކާމިޔާބުކޮށްދިނީ މި ސީޒަނުގައި މޮޅު ކުޅުމެއް ދައްކަމުން އަންނަ ރޮބަޓް ލެވަންޑޯސްކީ އެވެ. މިއީ މި ސީޒަނުގެ ޖަރުމަން ލީގުގައި ލެވަންޑޯސްކީ ކާމިޔާބުކުރި 30 ވަނަ ލަނޑެވެ.

މެޗުގައި ލެވަކޫސަން އިން ކާމިޔާބުކުރި ދެވަނަ ލަނޑު، މެޗުގެ 74 ވަނަ މިނެޓުގައި ޖަހައިދިނީ އެލެކްސެންޑާ ޑްރަގޮވިޗް އެވެ.

މީގެ އިތުރުން ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުން ތާވަލުގެ ދެވަނައިގައި އޮތް ބޮރޫޝިއާ ޑޯޓްމުންޑް ވަނީ ހާތާ ބާލިން އަތުން ހަނި ގޮތަކަށް މޮޅުވެފައެވެ. އަމިއްލަ ދަނޑުގައި ކުޅުނު މި މެޗުން ޑޯޓްމުންޑް މޮޅުވީ 1-0 ގެ ނަތީޖާއަކުންނެވެ.

މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގައި ފެނިގެންދިޔަ ހަމައެކަނި ލަނޑު ޑޯޓްމުންޑުން ކާމިޔާބުކޮށްފައިވަނީ ދެވަނަ ހާފުގައެވެ. މެޗުގެ 58 ވަނަ މިނެޓުގައި ޖޫލިއަން ބްރަންޓްގެ އެހީއާއެކު މި ލަނޑު ޑޯޓްމުންޑަށް ކާމިޔާބުކޮށްދިނީ އެމްރޭ ޗޭން އެވެ.

ހޮނިހިރު ދުވަހުގެރޭ ކުޅުނު މެޗުތަކުން ބަޔާން އާއި ޑޯޓްމުންޑުވެސް މޮޅުވިއިރު، ލީގުގައި ބާކީ އޮތް ހަތަރު މެޗުން، ލީގު ޗެމްޕިއަންކަން ކަށަވަރުކުރަން ބަޔާނަށް ދެން ބޭނުންވަނީ އެންމެ ހަ ޕޮއިންޓެވެ. ތާވަލުގެ އެއްވަނައިގައި ހަތް ޕޮއިންޓުގެ ލީޑަކާއެކު ބަޔާން އިތްއިރު، އެ ޓީމަށް ކުޅުނު 30 މެޗުން ވަނީ 70 ޕޮއިންޓު ލިބިފައެވެ. އަދި ދެވަނައިގައި އޮތް ޑޯޓްމުންޑަށް ލިބިފައިވަނީ 30 މެޗުން 63 ޕޮއިންޓެވެ.