ރައީސް ޔާމީނަށް މިދިޔަ ސަރުކާރުގައި ދިން ލުއިތަކަށްވުރެ އިތުރު ލުއިތަކެއް މި ސަރުކާރުން ފޯރުކޮށެއްނުދޭ: މަލީހު
އެމަނިކުފާނު ސަޕޯޓަރުންނާ މުޚާތަބުކުރައްވައި ވާހަކަފުޅުދެއްކެވުމުގެ ހައްގު ނިގުޅައިގެންފައިވޭ
ރައީސް ޔާމީން ޕީއެންއެފަށް ސޮއިކުރެއްވުން
ކުރީގެ ރައީސް އަބްދުﷲ ޔާމީނަށް މިދިޔަ ސަރުކާރުގައި ދިން ލުއިތަކަށްވުރެ އިތުރު ލުއިތަކެއް މި ސަރުކާރުން ފޯރުކޮށްނުދޭކަމަށް، ކުރީގެ މިނިސްޓަރު މަލީހު ޖަމާލު ވިދާޅުވެއްޖެއެވެ.
އާދިއްތަ ދުވަހުގެ ރޭ ޕީއެންއެފް އޮފީހުގައި ރައީސް ޔާމީން ޕީއެންއެފަށް ސޮއިކުރެއްވުމަށް ބޭއްވި ހަރަކާތުގައި ވާހަކަފުޅުދައްކަވަމުން މަލީހު ވިދާޅުވީ ރައީސް ޔާމީން އަދިވެސް ހުންނެވީ ޖަލު ބަންދުގައި ކަމަށާއި، އެމަނިކުފާނު ސަޕޯޓަރުންނާ މުޚާތަބުކުރައްވައި ވާހަކަފުޅުދެއްކެވުމުގެ ހައްގު ނިގުޅައިގެންފައި ވާކަމަށެވެ.
ރައީސް ޔާމީނަށް މި ސަރުކާރުން ދެވޭނެ ލުއިތައް އެބަހުރިކަމަށާއި، އެހެންނަމަވެސް އެ ލުއިތައް ނުދޭކަމަށް މަލީހު ވިދާޅުވިއެވެ. ޕީޕީއެމް/ޕީއެންސީން ވަކާލަތުކުރި މުހިންމު ކަންތައްތަކުގެ މަތިން ސަރުކާރު ހަނދާންނެތިފައި ވާކަން ފާހަގަކުރައްވަމުން މަލީހު ވިދާޅުވީ، އެ ކަންތައްތަކަކީ ރާއްޖޭގައި ބޭރުގެ ސިފައިން ތިބުމާއި، ކަނޑުތައް ވިއްކާލުމުގެ މައްސަލައާއި، ބޭރުގެ ގައުމުތަކާއެކު ހެދިފައި ހުރި އެކި އަސްކަރީ އެއްބަސްވުންތަކުގެ މައްސަލަ ކަމަށެވެ.
ޕީއެންއެފަށް ރައީސް ޔާމީން ސޮއިކުރެއްވުމަކީ އެމަނިކުފާނުގެ ހަޔާތްޕުޅުގައި ސިޔާސީ އިސްލާހީ މަސައްކަތުގެ އައު ފެށުމަށް ކަމަށްވެސް މަލީހު ވިދާޅުވިއެވެ. ޕީއެންއެފަކީ ރައީސް ޔާމީނުގެ ޕްރޮޑަކްޓެއް ކަމަށާއި، އަދި ޕީއެންއެފަކީ އައު ޕީޕީއެމާއި ޕީއެންސީކަމަށް ވިދާޅުވިއެވެ. މި ސަރުކާރު ހަމަ މަގަށް އެޅުވުމަށް ކުރަންޖެހުނު ކޮންމެ ކަމެއް ޕީއެންއެފުން ކުރާނެކަން މަލީހު ވަނީ ފާހަގަކުރައްވާފައެވެ.
މަލީހު މިފަދައިން ވިދާޅުވެފައިވާއިރު ކަރެކްޝަންސްއިން ވަނީ، ރައީސް ޔާމީން ސިޔާސީ މަސައްކަތް ކުރައްވާތީ، އެމަނިކުފާނު އެއްބަސްވުމާ ޚިލާފަށް އަމަލުފުޅުތައް ތަކުރާރުކުރައްވާނަމަ އިގުރާރު ބަދަލުކުރާނެކަމުގެ އިންޒާރު ދީފައެވެ.
