ޖަރުމަނު ލީގުގެ އެންމެ ފަހުގެ ޗެމްޕިއަން ބަޔާން މިއުނިކް އެނބުރި އަންނާނީ ވަރުގަދަކޮށް ކަމަށް، އެ ޓީމަށް ކުޅެމުން އަންނަ ޖަރުމަނުގެ ތޯމަސް މުލާ ބުނެފިއެވެ.
މުލާ މިހެން ބުނީ ޖަރުމަނު ލީގުގައި އައިންޓްރަކްޓް ފްރޭންކްފާޓާ ދެކޮޅަށް ކުޅުނު މެޗުން ބަޔާނަށް ލިބުނު ލަދުވެތި ބައްޔާއެކުއެވެ. މިއީ މި ސީޒަންގެ ޖަރުމަނު ލީގުގައި ބަޔާން ބަލިވި ފުރަތަމަ މެޗެވެ.
މުލާ ބުނީ، އެ މެޗުގައި ބަޔާނަށް ރަނގަޅަށް ނުކުޅެވުނު ކަމަށާއި، އެ މެޗުގައި ގިނަ ގޯސްތަކެއް ވެސް ހެދުނު ކަމަށެވެ. އެކަމުގެ ނަތީޖާއެއްގެ ގޮތުން ފްރޭންކްފާޓުން ބަޔާނަށް "ބޮޑު އަދަބެއް" ދީފި ކަމަށް އޭނާ ވަނީ ފާހަގަކޮށްފައެެވެ. މުލާ ބުނީ މިހާރު ކުރަން ޖެހޭނެ ކަމަކީ، މެޗުން ހެދުނު ގޯސްތައް ދެނެގަތުން ކަމަށާއި، އެއަށްފަހު އެކަން ރަނގަޅު ކުރަން މަސައްކަތް ކުރުން ކަމަށެވެ. އޭނާ ފާހަގަ ކުރި ގޮތުގައި ރަށުން ބޭރުގައި ކުޅޭ މެޗުތައް ކާމިޔާބު ކުރަން ބޭނުންވާ ޖޯޝާއި، ފޯރި އަދި ހަކަތަ ބަޔާންގެ ކުޅުންތެރިންގެ ކިބައިގައި ނެތެވެ. މުލާ ހިމެނޭހެން، ޓީމުގެ ހުރިހާ ކުޅުންތެރިންގެ ޖޯޝު ދަށްވެފައިވާ ކަމަށް އޭނާ ޤަބޫލު ކުރެއެވެ.
މީގެ އިތުރުން އޭނާ ބުނީ ބަޔާން އަކީ އަބަދު ވެސް އެފަދަ ޙާލަތްތައް ކުރިމަތިވުމުން، އެކަމުން އަރައި ގަންނާނެ ޓީމެއް ކަމަށެވެ. މީގެ ކުރިން ވެސް އެފަދަ މެޗުތައް ބަޔާނުން ކުޅެފައިވާނެ ކަމަށާއި، ކުރިއަށް އޮތް ތަނުގައި ޓީމު ނިކުންނާނީ އެންމެން އެކުވެގެން، ޙާލަތު ބަދަލު ކުރުމަށް ކަމަށް ވެސް އޭނާ ބުންޏެވެ. ބައްޔާއެކު ބަޔާނަށް ލީގު ތާވަލްގެ އެއް ވަނަ ގެއްލުމުން މުލާ ބުނީ، ވާދަވެރި ލީގެއްގައި އެންމެ މެޗަކުން ކަންކަން ކަނޑަަނޭޅޭނެ ކަމަށެވެ. ޚާއްސަކޮށް މިދިޔަ ސީޒަންގައި އެކަން ފެނުނު ކަމަށާއި، އެންމެ ފަހު ވަގުތާ ހަމައަށް މަސައްކަތް ކުރުން ނޫން ގޮތެއް ނެތް ކަމަށް ވެސް އޭނާ ވަނީ ބުނެފަ އެވެ.
ބަޔާނަށް ދެން އޮންނާނީ ޔުއެފާ ޗެމްޕިއަންސް ލީގު ގުރޫޕް ސްޓޭޖުގައި މެންޗެސްޓަރ ޔުނައިޓެޑާ ދެކޮޅަށް ކުޅޭ މެޗެވެ. އޭގެ ފަހުން ލީގުގައި އެ ޓީމު ނިކުންނާނީ ސްޓަޓްގާޓާ ދެކޮޅަށެވެ.
