އެމްބާޕޭ ކަންތަކުގައި ވާހަކަދައްކާކަށް އަންޗެލޮޓީ ބޭނުމެއްނުވޭ

ޕެރިސް ސެއިންޓް ޖާމަން (ޕީއެސްޖީ)އަށް ކުޅެމުން އަންނަ ފްރާންސްގެ ކީލިއަން އެމްބާޕޭ ހޯދުމަށް ރެއާލް މެޑްރިޑުން ކުރަމުން އަންނަ މަސައްކަތާ ގުޅިގެން އެއްޗެއް ބުނަން ބޭނުންނުވާ ކަމަށް، އެ ޓީމުގެ ކޯޗު ކާލޯ އަންޗެލޮޓީ ބުނެފިއެވެ.

ޕީއެސްޖީއާއެކު އެމްބާޕޭ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. އެހެންނަމަވެސް، އެމްބާޕޭ ކުލަބުގައި ބަހައްޓަން ޕީއެސްޖީން ބޭނުންވެއެވެ. އެކަމުގައި މިހާތަނަށް ޕީއެސްޖީއަށް އެމްބާޕޭ އާއެކު ވަކި ގޮތެެއް ނިންމިފައެއް ނުވެއެވެ. މީގެ ކުރިން، އެމްބާޕޭ ޕީއެސްޖީގެ އެއްބަސްވުން އައުނުކުރާނެ ކަމުގެ އަޑުތައްވެސް އޮތީ ފެތުރިފައެވެ. އެކަމާ ގުޅިގެން ޕީއެސްޖީއާއި އެމްބާޕޭގެ ގުޅުން ވަރަށް ބޮޑަށް ގޯސްވެސްވިއެވެ. ނަމަވެސް ފަހުން އެމްބާޕޭ ވަނީ ޕީއެސްޖީއާއެކު މަޝްވަރާކޮށް، ވަގުތީ ހައްލެއް ހޯދާފައި ކަމަށް ފްރާންސްގެ މީޑިއާތަކުން ވަނީ ރިޕޯޓުކޮށްފައެވެ.

ރެއާލުން އެމްބާޕޭ ހޯދުމަށް އަދިވެސް މަސައްކަތްކުރަމުން އަންނަކަމަށް ސްޕެއިންގެ މީޑިއާތަކުން ވަނީ ބުނެފައެވެ. އެކަމާ ގުޅިގެން ރެއާލްގެ ކޯޗު އަންޗެލޮޓީ ބުނީ، އެމްބާޕޭގެ ކަންތަކުގައި އެއްވެސް ވާހަކައެއް ދައްކައި، ކޮމެންޓު ކުރަން އޭނާ ބޭނުންނުވާ ކަމަށެވެ. އަނެއްކޮޅުން އެކަމުގައި ކުލަބުން ކުރަމުން އަންނަ މަސައްކަތުގެ ވާހަކަވެސް ދައްކަން ބޭނުންނުވާކަމަށް އޭނާ ވަނީ ބުނެފައެވެ.

މީގެ ކުރިންވެސް ރެއާލުން ވަނީ އެމްބާޕޭ ހޯދުމަށް ވަރަށް ބޮޑަށް މަސައްކަތް ކޮށްފައެވެ. އެފަހަރު ރެއާލަށް ބަދަލުވާން އެމްބާޕޭ އެއްބަސްވި ކަމަށްވެސް މީޑިއާ ތަކުން ވަނީ ބުނެފައެވެ. ނަމަވެސް ޕީއެސްޖީން ލިބުނު ބޮޑު ހުށަހެޅުމާއެކު، ފަހު ވަގުތު އެމްބާޕޭ ނިންމީ އެކުލަބުގައި މަޑު ކުރުމަށެވެ. އެފަހަރު އޭނާ ސޮއިކުރީ ދެ އަހަރު ދުވަހުގެ އެއްބަަސްވުމެއްގައެވެ.