އެމްޑީޕީގެ މާލެ ސިޓީ ކައުންސިލުގެ ބައި އިލެކްޝަނުގެ ކެމްޕޭން ރަސްމީކޮށް ލޯންޗުކުރުން ފަސްކޮށްފި
ޖަލްސާ ފަސްކުރީ މޫސުން ގޯސްވުމުގެ ސަބަބުން
މާލެ ސިޓީގެ މޭޔަރުކަމަށް ކުރިމަތިލުމަށް، އެމްޑީޕީ ޕްރައިމަރީގައި އާޒިމް ފޯމް ހުށަހަޅުއްވަނީ
މޯލްޑިވިއަން ޑިމޮކްރޮޓިކް ޕާޓީ (އެމްޑީޕީ)ގެ މާލެސިޓީ ކައުންސިލްގެ ބައި އިލެކްޝަންގެ ކެމްޕޭން ރަސްމީކޮށް ލޯންޗުކުރުން ފަސްކޮށްފިއެވެ.
އެ ޕާޓީން ބުނީ، ޖަލްސާ ފަސްކޮށްފައިވަނީ މޫސުން ގޯސްވުމުގެ ސަބަބުން ކަމަށެވެ. އަދި ޖަލްސާ ފަހުން ބާއްވާނެ ދުވަހެއް އަންގާނެ ކަމަށެވެ.
ކުރިން މި ޖަލްސާ ބޭއްވުމަށް ހަމަޖެހިފައި އޮތީ މިރޭ (ބުރާސްފަތި ދުވަހުގެ ރޭ) 08:30ގައެވެ. މި އިވެންޓުގައި، ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުވެސް ބައިވެރިވެވަޑައިގަންނަވާ ގޮތަށް ވަނީ ކުރިން ހަމަޖެހިފައެވެ.
މާލޭގެ މޭޔަރާއި ކައުންސިލްގެ ބައެއް ދާއިރާތަކަށް މެމްބަރުން ހޮވުމަށް ބާއްވާ ބައި-އިލެކްޝަނުގައި، އެމްޑީޕީގެ ފަރާތުން ވާދަކުރާ ކެންޑިޑޭޓުން ހޮވުމަށް ބާއްވަން އުޅުނު ޕްރަައިމަރީއަށް، ދާއިރާއަކުން އެކަކު ފިޔަވައި ފޯމު ހުށަހަޅާފައި ނުވާތީ، ވޯޓަކާނުލައި ޓިކެޓު ދޭން އެޕާޓީން ނިންމާފައިވެއެވެ.
މާލޭގެ މޭޔަރުކަމަށް އެ ޕާޓީން ނެރޭނެ ކެންޑިޑޭޓަކަށް ވެވަޑައިގަތުމަށް ފޯމު ހުށަހެޅުއްވީ އެމްޓީސީސީގެ ކުރީގެ ސީއީއޯ އާދަމް ޢާޒިމް އެކަންޏެވެ. މާލޭ ސިޓީ ކައުންސިލުގައި މިހާރު މެމްބަރަކު ނެތް ދާއިރާތައް ކަމަށްވާ؛ މެދު ހެންވޭރު ދާއިރާ، ހެންވޭރު ދެކުނު ދާއިރާ، އަދި މާފަންނު ދެކުނު ދާއިރާއަށް ވާދަކުރައްވަންވެސް ހުށަހެޅުއްވީ ކޮންމެ ދާއިރާއަކަށް އެންމެ ބޭފުޅެކެވެ.
