އަދުރޭ ޔާމީނަށް: ފޯކަސް ހުރީ މަޖިލިސް އިންތިހާބަށް، އެހެން ބަޔަކާ ކުރިމަތިލާން ޖެހޭނެތީ ނުވިސްނަން
މިހާރު އެންމެ ބޮޑު އިސްކަމެއް ދެއްވާނީ ސަރުކާރު ދަމަހައްޓަން މަޖިލީހުގެ ޣައުލަބިއްޔަތު ހޯދަން ކަމަށް އަބްދުއްރަހީމު ވިދާޅުވި
ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޗެއާޕާސަން އަދި ރައީސް މުއިއްޒުގެ ސްޕެޝަލް އެޑްވައިޒަރު އަބްދުއްރަހީމު އަބްދުﷲ (އަދުރޭ)
ސިޔާސީ ޕާޓީއެއް އުފައްދައި ހިންގުމަކީ ކޮންމެ ދިވެހި ރައްޔިތަކަށް ވެސް ލިބޭ ޙައްގެއް ކަމުން، ރައީސް ޔާމީން ޕާޓީއެއް އުފެއްދަވާކަމާމެދު ނުވިސްނަވާ ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޗެއާޕާސަން އަދި ރައީސް މުއިއްޒުގެ ސްޕެޝަލް އެޑްވައިޒަރު އަބްދުއްރަހީމު އަބްދުﷲ (އަދުރޭ) ވިދާޅުވެއްޖެ އެވެ.
ބުދަ ދުވަހުގެ ރޭ ޕީއެންސީގެ އޮފީސް، ސީ ޓްރެކް އިމާރާތުގެ 7 ވަނަ ފަންގިފިލާގައި ހުޅުވުމަށް ބޭއްވި ރަސްމިއްޔާތަށް ފަހު ވާހަކަފުޅު ދައްކަވަމުން އަބްދުއްރަހީމް ވިދާޅުވީ މިހާރު އެންމެ ބޮޑު އިސްކަމެއް ދެއްވަނީ ސަރުކާރު ދަމަހައްޓަން މަޖިލީހުގެ ޣައުލަބިއްޔަތު ހޯއްދަވަން ކަމަށެވެ. އެހެން ކަމުން އެކަން ވަރަށް ފޯރީގައި ކުރައްވާނެ ކަމަށް އޭނާ ވިދާޅުވި އެވެ.
އެއާ އެކު ރައީސް ޔާމީން އުފައްދަވާ އައު ޕާޓީ، ޕީޕަލްސް ނޭޝަނަލް ފްރޮންޓް (ޕީއެންއެފް) އަށް އިޝާރަތް ކުރައްވަމުން އަބްދުއްރަހީމް ވިދާޅުވީ އަންނަ މަޖިލިސް އިންތިހާބުގައި ބަޔަކު ޕާޓީއެއް އުފައްދައިގެން ކުރިމަތިލާން ނުކުތް ނަމަވެސް، އެކަމާ ނުވިސްނަވާ ކަމަށެވެ.
އަދި އޭނާގެ ފޯކަސް ހުރީ ޕީޕީއެމް އަދި ޕީއެންސީގެ ކޯލިޝަނުން މަޖިލީހުގެ ސާފު ޣައުލަބިއްޔަތު ހޯދުމަށް ކަމަށް އަބްދުއްރަހީމް ވިދާޅުވި އެވެ.
އަބްދުއްރަހީމް މިފަދައިން ވިދާޅުވި އިރު، ބުދަ ދުވަހުގެ ރޭ ރައީސް މުއިއްޒު ވެސް، ޕީޕީއެމް-ޕީއެންސީގެ ކޯލިޝަނުގެ ރައީސުގެ ހައިސިއްޔަތުން ވިދާޅުވީ ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ފުރިހަމަ ޣައުލަބިއްޔަތެއް ހޯދޭނެ ކަމާމެދު ޔަގީންކުރައްވާ ކަމަށެވެ.
