ޤަތަރުގެ ޤައުމީ ފުޓުބޯޅަ ޓީމުގެ ކޯޗުކަމުން ޕޯޗުގަލްގެ ކާލޮސް ކުއެރޯޒް ވަކިވެއްޖެ އެވެ.
ޤަތަރުގެ ކޯޗުކަމަށް ކުއެރޯޒް ހަމަޖެއްސީ މިއަހަރުގެ ފެބްރުވަރީ މަހު އެވެ. އެ މަޤާމަށް އޭނާ ހަމަޖެއްސީ ކުރިން އެ މަގާމުގައި ހުރި ފެލިކްސް ސަންޗޭޒްގެ އެއްބަސްވުން ހަމަވުމުންނެވެ. ޤަތަރުގެ ކޯޗަކަށް ކުއެރޯޒް ހަމަޖެއްސީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެެވެ. އޭނާއާ ހަވާލު ކުރި އެންމެ ބޮޑު އެއް މަސައްކަތަކީ އޭޝިއަން ކަޕަށް ތައްޔާރުވުމެވެ.
ޤަތަރުގެ ފުޓުބޯޅަ ފެޑެރޭޝަނުން ބުނީ، ޤައުމީ ޓީމުގެ ކޯޗުކަމުން ކުއެރޯޒް ވަކިވާން ނިންމީ، ދެ ފަރާތް އެއްބަސްވާ ގޮތެއްގެ މަތިންނެވެ. ގައުމީ ޓީމުގެ ކޯޗެއްގެ ގޮތުގައި ކުއިރޯޒް ހޭދަކުރި އިރު އޭނާ އަދާކުރި ހިތްވަރާއި، ލީޑާޝިޕާއި، ހިދުމަތް ފާހަގަކޮށް ފުޓުބޯޅަ ފެޑޭރޭޝަނުން ވަނީ އޭނާ އަށް ޝުކުރު އަދާކޮށްފަ އެވެ. އަދި މުސްތަޤުބަލުގައި އޭނާ އަށް އިތުރު ކާމިޔާބީ އަށް އެދޭ ކަމަށް ވެސް ވަނީ ބުނެފަ އެވެ.
އުމުރުން 70 އަހަރުގެ ކުއެރޯޒް އަކީ ފުޓުބޯޅައިގައި ތަޖުރިބާކާރު ކޯޗެކެވެ. އޭނާ ވަނީ ސްޕެއިންގެ ރެއާލް މެޑްރިޑަށް ވެސް އިރުޝާދު ދީފަ އެވެ. މީގެ އިތުރުން މެންޗެސްޓަރ ޔުނައިޓެޑުގައި އެލެކްސް ފާގަސަންގެ އެސިސްޓެންޓެއްގެ ގޮތުގައި ވެސް އޭނާ މަސައްކަތް ކުރި އެވެ. ޤަތަރާ ހަވާލުވުމުގެ ކުރިން އޭނާ ހުރީ އީރާން ޤައުމީ ޓީމުގެ ކޯޗަކަށެވެ. އީރާނާ އެކު އޭނާ ވަނީ ތިން ފަހަރެއްގެ މަތިން ފީފާ ވޯލްޑް ކަޕްގައި ވާދަކޮށްފަ އެވެ. އެއީ، 2014 ވަނަ އަހަރު ބްރެޒިލްގައި އޮތް މުބާރާތާއި، 2018 ވަނަ އަހަރު ރަޝިޔާގައި އޮތް މުބާރާތް އަދި އެންމެ ފަހުން 2022 ވަނަ އަހަރު ޤަތަރުގައި އޮތް މުބާރާތެވެ.
