ޔޫރަޕްގެ އެއާލައިންތަކަށް ގަލްފް ސަރަހައްދުން ދަތުރު ނުކުރުމަށް އިންޒާރު ދީފި
ގަލްފު ސަރަހައްދުގައި ހިނގަމުންދާ އަސްކަރީ ހަރަކާތްތަކުގެ ސަބަބުން މަދަނީ ބޯޓުފަހަރަށް ނުރައްކާ އޮތް ކަމަށް ބުނެ، އެ ސަރަހައްދުގެ ވައިގެ މަގު ބޭނުން ނުކުރުމަށް ޔޫރަޕިއަން އޭވިއޭޝަން ސޭފްޓީ އެޖެންސީން އެއާލައިންތަކަށް އިރުޝާދު ދީފި. މިސައިލާއި ޑްރޯން ހަމަލާތަކުގެ ބިރު އޮތުމާއެކު، އީރާނާއި އިރާގުގެ އިތުރުން ބަހްރައިން، ކުވެއިތު އަދި ޔޫއޭއީ ފަދަ ގައުމުތަކުގެ ވައިގެ ސަރަހައްދުތަކުން ދަތުރުކުރުމުގައި ސަމާލުވުމަށް އެ އެޖެންސީން ވަނީ އަންގާފައި.
ޔޫއެސްއެސް ޖޯޖް އެޗް.ޑަބްލިޔު ބުޝް (ސީވީއެން 77) މަނަވަރުގައި އެމެރިކާގެ ކަނޑުގެ ސިފައިން ފްލައިޓް އޮޕަރޭޝަންތައް ކުރިއަށް ގެންދަނީ. | ސްކްރީން އިމޭޖް
ގަލްފުގެ ވައިގެ ސަރަހައްދުން ދަތުރު ނުކުރުމަށް ޔޫރަޕްގެ އެއާލައިންތަކަށް އިންޒާރު ދީފި އެވެ.
ޔޫރަޕިއަން އޭވިއޭޝަން ސޭފްޓީ އެޖެންސީ (އީ.އޭ.އެސް.އޭ) އިން ބުނީ ބަހްރައިން، ކުވެއިތު، ގަތަރު، ޔުނައިޓެޑް އަރަބް އެމިރޭޓްސް (ޔޫ.އޭ.އީ) އަދި އޮމާން ކަނޑުގެ ސަރަހައްދުގެ މަތިން އެއާލައިންތަކުން ދަތުރު ނުކުރުމަށް އަންގާ ކަމަށެވެ.
އީ.އޭ.އެސް.އޭ އިން ނެރުނު ބަޔާނެއްގައި ބުނެފައިވަނީ، އެ ސަރަހައްދުގައި ކުރިއަށްދާ އަސްކަރީ ހަރަކާތްތަކަކީ ކުރިއާލާ ލަފާކުރަން ދަތި ކަންތައްތަކެއް ކަމަށާއި، މިސައިލާއި، ޑްރޯން އަދި ހަނގުރާމަމަތީ ބޯޓުފަހަރާއި ވައިގެ ދިފާއީ ނިޒާމުތައް ބޭނުންކުރުމުގެ ފުރުސަތު އޮތުމާއެކު، އެ ސަރަހައްދުގެ ވައިގެ ސަރަހައްދުން ދަތުރުކުރާ މަދަނީ ބޯޓުފަހަރަށް ކޮންމެ އުސްމިނެއްގައި އުދުހުނު ކަމުގައިވިޔަސް ބޮޑެތި ނުރައްކާތަކެއް ކުރިމަތިވެދާނެ ކަމަށެވެ.
މީގެ އިތުރުން، އީރާނާއި، އިރާގު އަދި ލުބުނާނުގެ ވައިގެ ސަރަހައްދު ބޭނުން ނުކުރުމަށް ވެސް އެ އެޖެންސީން މިދިޔަ ހަފުތާގައި އެއާލައިންތަކަށް ވަނީ އިރުޝާދު ދީފަ އެވެ.
މަސްދަރު: އަލް ޖަޒީރާ
