މި އަހަރު ސަރުކާރުގެ ޚަރަދުގައި 50 މީހަކު ހައްޖަށް ފޮނުވަން ނިންމަވައިފި
ފަސް އަހަރު ތެރޭގައި 1000 މީހުން ހައްޖަށް ފޮނުވާނެ
ރައީސް ޑރ. މުހައްމަދު މުއިއްޒު
މި އަހަރު ސަރުކާރުގެ ޚަރަދުގައި 50 މީހަކު ހައްޖަށް ފޮނުވުމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފިއެވެ.
އެމަނިކުފާނު މިގޮތަށް ނިންމަވާފައިވަނީ އަންގާރަ ދުވަހު ބޭއްވި ވަޒީރުންގެ މަޖިލީހުގައި ކުރެއްވި މަޝްވަރާތަކަށްފަހުއެވެ. މިކަން ހާމަކުރައްވައި ރައީސް ވިދާޅުވީ، ހައްޖަށް ދާން ބޭނުންވާ ފަރާތްތަކުގެ ތެރެއިން، ކުރިއަށް އޮތް 5 އަހަރުދުވަހުގެ ތެރޭގައި 1000 ފަގީރުންނަށް ހިލޭ ދެވޭނެގޮތް ހަމަޖެއްސެވުމަކީ އެމަނިކުފާނުގެ ރިޔާސީ ވައުދުފުޅެއްކަމަށާއި، އެކަން ކުރައްވާނެ ކަމަށެވެ.
މި މަސައްކަތް ފެށުމުގެ ގޮތުން މިއަހަރު ފުރަތަމަ ފޮނުވަން ނިންމާފައިވަނީ 50 މީހުންކަން ފާހަގަކުރައްވައި ރައީސް ވިދާޅުވީ، އެކި އަހަރު އެކި އަދަދަށް މީހުން ހައްޖަށް ފޮނުވާނެ ކަމަށެވެ.
ސަރުކާރުގެ ޚަރަދުގައި ހައްޖަށް ފޮނުވާނީ ފަގީރުންގެ ދަފުތަރުގައި ހިމެނޭ ފަރާތްތަކުގެ ތެރެއިން، ކަނޑައެޅޭ އުސޫލެއްގެ މަތިން ކަމަށް ރައީސް ވިދާޅުވިއެވެ. އެ އުސޫލު ސަރުކާރު ގެޒެޓްގައި އާންމުކުރެވޭނެ ކަމަށާއި، އެ މަސައްކަތް ފަސް އަހަރަށްފަހުވެސް ދާއިމީގޮތެއްގައި ކުރެވިގެންދާނެ ކަމަށް އުއްމީދު ކުރައްވާ ކަމަށް އެމަނިކުފާނު ވިދާޅުވިއެވެ.
