ފިލްމު "ނޮވެމްބަރު"، ޑިސެމްބަރުގައި ނުކުތް ނަމަވެސް ކުރާނެ ޝަކުވާއެއް ނެތް، އެއަށް ވުރެ ފިލްމު މާ ރީތި!
ނޮވެމްބަރުގެ ޓިކެޓް ހޯދަން ބޭނުންވާ ފަރާތްތަކުން އޮލިމްޕަސް ޓިކެޓް ކައުންޓަރުން ނުވަތަ 9911229 އަށް ގުޅުމުން ލިބޭނެ
ޑާކް ރެއިން އެންޓަޓައިންމެންޓުގެ ނޮވެމްބަރު ފިލްމް
ވަރަށް ދުވަސްވީ އިންތިޒާރެއްގެ ނިމުމެވެ. އެހެން ނަމަވެސް، އެ އިންތިޒާރު އަބަދަކު "ހިތި" ނުވާނެކަން ދައްކުވައިދޭ އެއް ހެއްކަކީ ޑާކް ރެއިން އެންޓަޓެއިންމެންޓް އިން ނެރުނު ނޮވެމްބަރު ފިލްމެވެ. ޑިސެމްބަރުގައި ނުކުތެއް ކަމަކު، ފިލްމާ މެދު ކުރާނެ ޝަކުވާއެއް ނެތެވެ. އޮތްހާ ވެސް އެއްޗަކީ ތައުރީފެވެ.
މި ފިލްމު ޙާއްޞަވާ ސަބަބުތައް ބައިވަރެވެ. ފިލްމުގެ ޝޫޓިން ނިމުނުތާ ތިން އަހަރު ފަހުން ސްކްރީނުގައި އެ ފިލްމު އެޅުވުން އެއީ އެއް ސަބަބެވެ. ފިލްމު ބަލާލަން ކެތްމަދުވެފައި ތިބި ސަޕޯޓަރުންނަށް އެ ފިލްމު ޙާއްޞަވާ އެއް ސަބަބަކީ އެއީއެވެ. ޔަގީނުން ވެސް، ތިން އަހަރުގެ އިންތިޒާރުން މާޔޫސް ކަމެއް ނުގެނުވިއެވެ. ގެނުވީ ރީތި ފިލްމެއް ބަލާލެވުނު ކަމުގެ ހިތްހަމަ ޖެހުމެވެ.
ދެން ހުރި ސަބަބުތަކެވެ. މި ފިލްމަކީ ޑާކް ރެއިން އިން ގެނައި އެންމެ އަގުބޮޑު ފިލްމަށް ވީއިރު، މި ފިލްމަކީ ރާއްޖޭގެ ފިލްމަކުން، ބޭރު އެހެން ގައުމެއްގެ ރީތިކަން ދައްކުވައިދޭ ފިލްމެކެވެ. އާންމުކޮށް ރާއްޖޭގެ ބައެއް ފިލްމުތައް އަވައްޓެރި ލަންކާގައި ޝޫޓުކޮށް ހެދި ނަމަވެސް، މި ފިލްމު އެ ފިލްމުތަކާ ތަފާތުވާ އެއް ސަބަބަކީ އެއީއެވެ. ނޮވެމްބަރުގެ ބޮޑުބައެއް، ޝޫޓްކޮށްފައިވަނީ ސިންގަޕޫރުގައެވެ.
އެގޮތުން ސިންގަޕޫރުގެ ރީތި އަދި ނަލަ މަންޒަރުތައް ދައްކުވައިދޭއިރު، ރާއްޖޭގެ އެކި ކަންކޮޅުތަކުގެ ގުދުރަތީ، ރީތި މަންޒަރުތައް ވެސް މި ފިލްމުން ދައްކުވައިދެއެވެ. އޭގެ ތެރޭގައި ރާއްޖޭގެ އެންމެ ދެކުނުން އައްޑޫ އަދި ލ. މާންދޫގެ ރީތި މަންޒަރުތަކާއި އަދި މާލެ އަތޮޅުގެ ރީތި މަންޒަރުތައް ވެސް މި ފިލްމުން ދައްކުވައިދެއެވެ.
ދެން އޮތީ ނޮވެމްބަރުގެ އެންމެ ޚާއްސަ ސަބަބެވެ. އެ ފިލްމުގެ މައިގަނޑު ތިން ތަރިންނެވެ. ސައިޑް ރޯލެއްގެ ގޮތުގައި ރާއްޖޭގެ ނަން މަޝްހޫރު، އަދި ހުނަރުވެރި އެކްޓަރު އިސްމައީލް ވަޖީހް ފެނުނު ނަމަވެސް، ވަޖީހު ހިމަނައިގެން މައިގަނޑު ތިން ތަރިން ގުނަނީ ސަބަބުތަކެއް ހުރީމައެވެ.
އެގޮތުން އައިޝަތު ފުވާދު އަދި އަޙްމަދު ތޮލާލުގެ މި ވާހަކައިގެ މައްޗަށް، ވަޖީހުގެ މުޅި ކެރެކްޓާ ބިނާކޮށްފައި އޮތީ، ވަރަށް ދުވަސްފަހުން ދިވެހިންނަށް ފިލްމަކުން ފެނުނު ވަޖީހު އަށް ޚާއްސަކޮށެވެ. އަދި އެ ފިލްމުގެ އެންމެ މުހިންމު ދެތަރިން ކަމަށްވާ މަރިޔަމް މަޖުދާ އަދި ޖުމައްޔިލް ނިމާލްގެ ލޯބީގެ ވާހަކައިގެ މުހިންމު ހިއްސާއަކަށް އަދި ހިއްސާދާރަކަށް ވެސް ވަޖީހު ވުމަކީ ވެސް އެއް ސަބަބެވެ.
ފިލްމަށް ބަލާއިރު، މި ފިލްމަކީ ލޯބީގެ ދުނިޔެއެއްގައި ހިނގާ އެކި ކަންތައްތަކެއް ދައްކުވައިދޭ ފިލްމެކެވެ. ތަފާތު އިހުސާސުތަކެއް ދައްކުވައިދޭ އަދި ގެނުވައިދޭ ފިލްމެކެވެ. ބައެއް ފަހަރު އުފަލެވެ. އަނެއް ފަހަރު ސުވާލުމާކެވެ. އަނެއް ފަހަރު ދެރައެވެ. ބައެއް ފަހަރު ރުޅި ވެސް މެއެވެ.
އެ ހުރިހާ ކަމަކާ އެކު ފިލްމުން ދައްކުވައިދެނީ، އެ ލޯބީގެ ދުނިޔޭގައި ދިރިއުޅުމެއް ހޯދުމަށް މަސައްކަތް ކުރަމުން ދިޔަ ދެ މީހެކެވެ. އެއީ އެ މައިގަނޑު ދެ ތަރިން ކަމަށްވާ މަޖުދާ އަދި ޖުމައްޔިލު އެވެ. އަދި އެ ދިރިއުޅުމުގެ ތެރޭގައި ދިމާވާ ކަންކަމެވެ. އެންމެ ހީނުކުރާ ކަންކަން ވެސް ހިމެނޭ ގޮތުންނެވެ.
މުޅި ފިލްމަކީ ލޯބީގެ ފިލްމަކަށްވީ ނަމަވެސް، އެ ފިލްމުން ގިނަ ވާހަކަތަކެއް، ފިލާވަޅުތަކެއް އަދި އިބުރަތްތަކެއް ވެސް ގެނެސްދެއެވެ. އެންމެ މުހިންމު ކަމަކަށް، އުންމީދަކީ ގެއްލުވާލަންޖެހޭ އެއްޗެއް ނޫން ކަން އެ ފިލްމުން އެކަނި ވެސް ސާބިތުކޮށްދެއެވެ. ފިލްމުގެ ވާހަކައިން އަދި މުޅި ފިލްމުގެ މަސައްކަތުން ވެސް އެކަން ފެނެ އެވެ. އެކަމަށް، އެ ފިލްމުގެ މުޅި ޓީމަށް ހަމަ ސާބަހެވެ. ފިލްމަށް ހަމަ 100 އެވެ.
