މާރާމާރީގެ މައްސަލައަކާއި ގުޅިގެން ފުލުހުން ހޯދަން އިއުލާނު ކުރިތާ މަސް ދުވަސް ފަހުން އަމިއްލައަށް ފުލުހުންނާއި ހަވާލުވި ސ. މަރަދޫފޭދޫ / ރަށްދެބައިގެ، އިބްރާހީމް ފައިހް ނިޒާމް ޝަރީޢަތުގެ މަރުޙަލާ ނިމެންދެން ބަންދުކޮށްދޭން އެދުމުން، 45 ދުވަހަށް ބަންދުކޮށްފައިވަނީ ރަނގަޅަކަށް ނޫންކަމަށް ހައިކޯޓުން ނިންމައިފިއެވެ.
މި މައްސަލައަކީ 24 ފެބްރުއަރީ 2023 ގައި މާފަންނުގެ ފިހާރައެއްގެ ތެރޭގައި ސ.ހިތަދޫ / އިޒުމީރު މުޙައްމަދު އަޙްމަދުދީދީއަށް ތޫނު އެއްޗަކުން ޙަމަލާދީ މަރާލާފައިވާ މައްސަލައިގައި ފައިޙް ބަންދު ނުކުރުމަށް ނެރުނު އަމުރާމެދު ހިތްހަމަނުޖެހިގެން ދައުލަތުން ހައިކޯޓަށް ހުށައަޅާފައިވާ މައްސަލައެކެވެ.
ތޫނު ހަތިޔާރުން ހަމަލާދީ ޒަހަމުކޮށްލާފައިވުމުގެ ސަބަބުން މުޙައްމަދު އަޙްމަދުދީދީއަށް ލިބުނު އަނިޔާތަކަށް ފަރުވާދެމުންދަނިކޮށް ނިޔާވެފައިވާ މައްސަލައިގައި ކޯޓު އަމުރެއްގެ ދަށުން އޭނާ ހައްޔަރު ކުރިއެވެ. އެއީ 6 ނޮވެމްބަރު 2023ގައެވެ.
އޭރު ޝަރީޢަތުގެ މަރުޙަލާ ނިމެންދެން ރިމާންޑް ޖަލެއްގައި ފައިޙް ބަންދުކުރުމަށް ފުލުހުން އެދުމުން، ކޯޓުން ނިންމީ އޭނާ 45 ދުވަހަށް ބަންދު ކުރުމަށެވެ.
މިއީ ކްރިމިނަލް ކޯޓުގެ އެ ނިންމުމާމެދު ހިތްހަމަނުޖެހިގެން ދައުލަތުން ހައިކޯޓަށް ހުށައެޅި މައްސަލައެކެވެ.
އޭނާގެ މައްޗަށް މިހާރުވެސް މާރާމާރީގެ މައްސަލައެއްގައި ދައުވާކޮށް ޝަރީއަތް ކުރިއަށްދެއެވެ.
ފަނޑިޔާރުން ވަނީ ކްރިމިނަލް ކޯޓުގެ އަމުރަކީ ބާތިލު އަމުރެއްކަމަށް ކަނޑައަޅުއްވާފައެވެ.
އަދި 5 ޑިސެމްބަރުން ފެށިގެން 7 ދުވަހުގެ ތެރޭގައި އޭނާ ތަހުގީގު މަރުޙަލާއާއި ޝަރީއަތުގެ މަރުޙަލާ ނިމެންދެން ބަންދުގައި ބެހެއްޓުމަށް އެދި ކަމާބެހޭ ކޯޓަށް ހުށައަޅައިފިނަމަ، ހައިކޯޓުގެ ނިންމުމުގައި ބަޔާންކޮށްފައިވާ އުސޫލުތަކަށް ބަލައި އޭނާގެ ބަންދާމެދު އަލުން ގޮތެއް ނިންމުމަށް ހައިކޯޓުން ވަނީ އަންގާފައެވެ.
