ނިއުކާސަލަށް ނުތަނަވަސްކަމެއް، ޕޯޕަށް އަނިޔާވެ ކުޅުމާ ދުރަށް

ނިއުކާސަލް ޔުނައިޓެޑުގެ އެއް ނަންބަރު ގޯލު ކީޕަރު ނިކް ޕޯޕަށް ލިބުނު އަނިޔާގެ ސަބަބުން އޭނާ ކުޅުމާ ދުރަށް ދާން ޖެހިއްޖެ އެވެ.

އުމުރުން 31 އަހަރުގެ ޕޯޕަށް އަނިޔާވެފައި ވަނީ އިނގިރޭސި ޕްރިމިއާ ލީގުގައި ނިއުކާސަލް އިން މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުގަ އެވެ. ޔުނައިޓެޑުގެ މައްޗަށް ނިއުކާސަލް އިން ކުރި ހޯދި މެޗުގައި ލިބުނު އަނިޔާގެ ސަބަބުން އޭނާ ވަނީ ބަދަލުކޮށްފަ އެވެ.

ޕޯޕަށް ލިބުނީ ކޮނޑު ހުޅުގެ އަނިޔާ އެކެވެ. އެ އަނިޔާގެ ސަބަބުން އޭނާ އަށް ޖެހެނީ ސާޖަރީއެއް ހަދާށެވެ. އެ ސާޖަރީ އަށް ފަހު، ޕޯޕަށް އަލުން އެނބުރި ކުޅުމުގެ ތެރެއަށް އާދެވޭނެ ކަމަށް ބެލެވެނީ ހަތަރު މަސް ދުވަަސް ފަހުންނެވެ. އެހެންކަމުން އަންނަ އަހަރުގެ އޭޕްރީލް މަހާއި ހަމައަށް ޕޯޕް ހުންނަން ޖެހޭނީ ކުޅުމާ ދުރުގަ އެވެ. މިއީ އިނގިރޭސި ޕްރިމިއާ ލީގުގައި ރަނގަޅު ވާދައެއް ކުރަމުން އަންނަ ނިއުކާސަލް އަށް ކުރިމަތިވާނެ ނުތަނަވަސްކަމެކެވެ.

ބާންލީގައި ހުރުމަށްފަހު ޕޯޕް ނިއުކާސަލަށް ބަދަލުވީ މިދިޔަ އަހަރު އެވެ. އޭގެ ފަހުން އޭނާ ވަނީ މިހާތަނަށް 62 މެޗުގައި ނިއުކާސަލްގެ ގޯލު ބަލަހައްޓައިފަ އެވެ. މިހާރު ކުރިއަށްދާ ސީޒަންގައި އޭނާ ވަނީ ޖުމުލަ 20 މެޗުގައި އެ ޓީމުގެ ގޯލު ބަލަހައްޓައިފަ އެވެ.