މަޖިލީހުގެ އިދާރާގެ ޗީފް އޮފް ބިއުރޯގެ މަގާމަށް ފާތިމަތު މުހައްމަދު ސާލިހު (ފާތޭ) އައްޔަންކުރައްވައިފިއެވެ.
ތިން ރައީސުންގެ އަރިހުގައި ރައީސްގެ ސެކްރެޓަރީއެއްގެ ގޮތުގައި ހުންނެވި ފާތިމަތު މުހައްމަދު ސާލިހު (ފާތޭ) މަޖިލީހުގެ އިދާރާގެ ޗީފް އޮފް ބިއުރޯގެ މަގާމަށް އައްޔަންކުރައްވާފައި ވާކަން މަޖިލީހުން ވަނީ ރާއްޖެއެމްވީއަށް ކަށަވަރުކޮށްދީފައެވެ.
ރައީސް އިބްރާހީމް މުހައްމަދު ސާލިހުގެ ވެރިކަން ނިމުމާއެކު، ފާތިމަތު މުހައްމަދު ސާލިހު ވަނީ އޭނާ ރައީސް އޮފީހުގައި ހުންނެވި މަގާމުން އިސްތިއުފާދެއްވާފައެވެ. ފާތިމަތު މުހައްމަދު ސާލިހު ރާއްޖެއެމްވީއަށް މައުލޫމާތު ދެއްވަމުން ވިދާޅުވީ، ރައީސް އޮފީހުން އިސްތިއުފާދެއްވީ ރައީސް އިބްރާހީމް މުހައްމަދު ސާލިހުގެ ދައުރު ހަމަވުމާއެކު، 17 ނޮވެމްބަރުގައި ކަމަށެވެ.
އޭނާ ވަނީ ރައީސް މައުމޫނާއި ރައީސް ޔާމީނުގެ ވެރިިކަމުގައިވެސް ޕްރޮޓޮކޯލްގައި މަސައްކަތްކުރައްވާފައެވެ.
ފާތިމަތު މުހައްމަދު ސާލިހު ޚިދުމަތަށް ނިކުންނެވީ މީގެ 37 އަހަރު ކުރިން، 1986ގެ ފެބްރުވަރީގައެވެ. މިހާތަނަށް ތިން ރައީސުންގެ އަރިހުގައި ރައީސްގެ ސެކްރެޓަރީއެއްގެ ގޮތުގައި ހުންނެވި، ހަމައެކަނި ފާތިމަތު މުހައްމަދު ސާލިހު ވަނީ ރައީސް މައުމޫން އަބްދުލްގައްޔޫމު، ރައީސް އަބްދުﷲ ޔާމީން އަބްދުލްގައްޔޫމް އަދި ރައީސް ސާލިހުގެ ސެކްރެޓަރީއެއްގެ މަގާމު އަދާކުރައްވާފައެވެ.
