"މިހާރު ފެށިގެން މިދަނީ މަސައްކަތްތަކުގެ ނަތީޖާ ފެނުމުގެ މަރުހަލާ، ކުރިން ފެނުނީ ފަރުދާގެ ފުރަގަހުން ކުރެވުނު މަސައްކަތް"

މި ސަރުކާރަށް ދޮޅު އަހަރުވީއިރު އަދި މިފެނުނީ ވެރިކަމުގެ ފަރުދާގެ ފުރަގަހުން ކުރެވުނު މަސައްކަތް ކަމަށާއި މިހާރު ފެށިގެން މިދަނީ އަމަލީ ގޮތުން ކުރެވުނު ހުރިހާ މަސައްކަތެއްގެ ނަތީޖާ ފެނިގެން ދިއުމުގެ މަރުހަލާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މުއިއްޒު މިފަދައިން ވިދާޅުވެފައި ވަނީ ނ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު މަގޫދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

Advertisement

ރައީސް މުއިއްޒު ވިދާޅުވީ އެމަނިކުފާނުގެ ވެރިކަމުގައި މިހާރު ފެށިގެންދާ މަރުހަލާއަކީ ބިހައިންޑް ދަ ސީންއަށްފަހު، އަމަލީ މައިދާނުގައި ކުރިން ކުރެވުނު މަސައްކަތްތައް ފެންނަ މަރުހަލާ ކަމަށެވެ.

މިހާރު މި ފެށެނީ އަދި ފެށިގެން މިދަނީ އަމަލީ ގޮތުން މި ކުރެވުނު ހުރިހާ މަސައްކަތެއްގެ ނަތީޖާ ފެނިގެން ދިއުމުގެ މަރުހަލާ. ކުރިން މިދިޔައީ ފަރުދާގެ ފުރަގަހުން ކުރެވުނު މަސައްކަތް. ބިހައިންޑް ދަ ސީން. ދެން އިރާދަކުރެވިއްޔާ އަމަލީ މައިދާނުން އެ މަސައްކަތް މިހާރު ދެން ފެނިގެން މިދަނީ

ރައީސް މުއިއްޒު

ރައީސް މުއިއްޒު ވިދާޅުވީ ކުރިން ކުރެވުނު މަސައްކަތްތަކާއެކު މަހަކަށްވުރެ މަހެއް ރަށްރަށުގައި ކުރެވޭ މަސައްކަތްތައް ފެންނަލެއް ގިނަވެގެންދާނޭ ކަމަށެވެ.

ރައީސް ވިދާޅުވީ މިދިޔަ ދޮޅު އަހަރު ތެރޭގައި މަސައްކަތް ކުރީ ރަށްރަށުގައި ކުރަން ހުރި މަސައްކަތްތައް ކުރެވޭނެ ގޮތަށް ކަންކަން ތަރުތީބުކޮށް، ހުއްޓިފައި ހުރި މަޝްރޫއުތައް ވެސް ކުންފުނިތަކާއި ހަވާލުކޮށް މަސައްކަތްތައް ކުރެވޭނެ މަގު ކޮށުމަށް ކަމަށެވެ.

ރައީސް މުއިއްޒު އަންގާރަ ދުވަހު ވިދާޅުވީ ރައްޔިތުންނަށް ވައުދުވި ހުރިހާ މަޝްރޫއެއް ވެސް ކުރިއަށް ގެންދާނީ އިގްތިސާދީ ގޮތުން ދިމާވި ހުރަސްތަކުން އަރައިގަނެ، ދަރަނި ދެއްކުމުގައި ވެސް ދަތިނުވާ ގޮތަށް ރޭވުންތެރިކަމާއެކުގައި ކަމަށެވެ.

މިގޮތުން މި އަހަރު ބާކީ އޮތް ދުވަސްތަކުގައި ގިނަ މަސައްކަތްތަކެއްގެ އަމަލީ މަސައްކަތް ފަށައި އަންނަ އަހަރު ވައުދުވި ހުރިހާ މަޝްރޫއެއްގެ މަސައްކަތް ފައްޓަވާނެ ކަމަށް ރައީސް ވިދާޅުވިއެވެ.

އަދި 2028 ގެ ނިޔަލަށް ވައުދުވި ހުރިހާ މަޝްރޫއެއްގެ މަސައްކަތް އެއްކޮށް ނިންމާނެ ކަމުގެ ޔަގީންކަން ވެސް ރައީސް ދެއްވިއެވެ.