އެމްޑީޕީއަކީ ކޮންމެ މީހަކަށް ވެސް ފުރުސަތު އޮތް، ކުރިއަށްދާން މަގު ކޮށައިދޭ ޕާޓީއެއް: މެންބަރު ސަލީމް
ރައްޔިތުންގެ ހައްގުގައި ކުރަންޖެހުނު ކޮންމެ މަސައްކަތެއް އެމްޑީޕީން ކުރާނެ
ހޯރަފުށީ ދާއިރާގެ މެންބަރު އަހުމަދު ސަލީމް
ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަކީ ކޮންމެ މީހަކަށް ވެސް ފުރުސަތު އޮތް، ކުރިއަށްދާން މަގު ކޮށައިދޭ ޕާޓީއެއް ކަމަށް ހޯރަފުށީ ދާއިރާގެ މެންބަރު އަހުމަދު ސަލީމް ވިދާޅުވެއްޖެއެވެ.
އާދިއްތަ ދުވަހުގެ ރޭ މަޖިލީހުގައި ބޭއްވި ޚާއްސަ ޖަލްސާގައި، ހުސްވެފައިވާ މަޖިލީހުގެ ނާއިބު ރައީސް ކަމުގެ މަގާމަށް އިންތިޚާބު ކުރެއްވުމާއި ގުޅިގެން ވާހަކަފުޅު ދައްކަވަމުން މެންބަރު ސަލީމް ވިދާޅުވީ އެމްޑީޕީއަކީ ހަގީގީ ޑިމޮކްރަޓިކް ޕާޓީ ކަމަށާއި، އެކަން މި ވޯޓުން ވެސް ފެނިގެން ގޮސްފައިވާ ކަމަށެވެ. އަދި މި ޕާޓީން ކުރިއަށް ދިއުމުގެ ފުރުސަތު ކޮންމެ މީހަކަށް ލިބޭ ކަމަށް މެންބަރު ސަލީމް ވިދާޅުވިއެވެ.
މެންބަރު ސަލީމް ވިދާޅުވީ ރައްޔިތުންގެ ހައްގުގައި ކުރަންޖެހުނު ކޮންމެ މަސައްކަތެއް އެމްޑީޕީން ކުރާނެ ކަމަށެވެ.
މެންބަރު ސަލީމް ވިދާޅުވީ މިވަގުތަކީ ގައުމު އިސްކޮށް، މަސްއޫލިއްޔަތާއި، ޒިންމާތަކާއި، ވާޖިބުތަކާއި، މަތިވެފައިވާ މަސައްކަތްތަކާއިގެން ކުރިއަށްދާންވީ ވަގުތު ކަމަށެވެ.
އެމްޑީޕީއަކީ މިގައުމުގެ މިއަދުގެ އޮޕަޒިޝަން ޕާޓީކަން ފާހަގަކުރައްވައި މެންބަރު ސަލީމް ވިދާޅުވީ އެމްޑީޕީން ސަރުކާރަށް ފާރަވެރިވާނެ ކަމަށާއި، ސަރުކާރުން ކަން ކުރާ ގޮތާއި މެދު ފުންކޮށް ބަހުސްކޮށް މަޖިލީހަށް ފެންނަ އެންމެ ރަނގަޅު މަގުން މަގުދައްކައިދޭނީ އެމްޑީޕީން ކަމަށެވެ.
އެހެންކަމުން ކުރިއަށް އޮތް ދައުރުގައި މަޖިލީހުގެ ރިޔާސަތަށް މެންބަރުންގެ ފަރާތުން ވަރަށް ބޮޑު އެއްބާރުލުމެއް ލިބޭނެކަމާމެދު ޝައްކުނުކުރައްވާ ކަމަށް މެންބަރު ސަލީމް ވިދާޅުވިއެވެ.
