ކޮޕާ އެމެރިކާ އަށް ފަހު އާޖެންޓީނާގެ ކޯޗު ވަކިވަނީ
އޭނާ ބުނީ ސަޕޯޓަރުންގެ އުއްމީދުތައް މަތިވިއިރު، އަބަދު ކާމިޔާބު ނުލިބޭނެ ކަމަށް
އާޖެންޓީނާގެ ކޯޗު ސްކަލޯނީ
ކޮޕާ އެމެރިކާ ފުޓްބޯޅަ މުބާރާތަށް ފަހު އާޖެންޓީނާގެ ކޯޗުކަމުން ވަކިވާން ލަޔޮނަލް ސްކަލޯނީ ނިންމައިފި އެވެ.
އާޖެންޓީނާގެ އާއި ދުނިޔޭގެ މަޝްހޫރު މީޑިއާތަކުން ބުނާ ގޮތުގައި އަންނަ އަހަރު ޖޫން މަހު އެމެރިކާގައި ބާއްވާ ދެކުނު އެމެރިކާ ސަރަހައްދުގެ ފުޓްބޯޅަ މުބާރާތަކީ ސްކަލޯނީގެ ފަހު މުބާރާތެވެ. ނަމަވެސް އޭނާ ޓީމާ ވަކިވާ ސަބަބު ޔަގީނެއްނޫނެވެ. އެއް ބަޔަކު ބުނަނީ ސްކަލޯނީ ގައުމީ ޓީމާ ވަކިވާން ނިންމީ މިދިހަ އަހަރުގެ ޑިސެމްބަރު މަހު ގަތަރުގައި ބޭއްވި ވޯލްޑްކަޕް ފުޓްބޯޅަ މުބާރާތުގެ ބޯނަސް އާޖެންޓީނާގެ ފެޑަރޭޝަނުން އޭނާ އަށް ދީފައިނުވާތީ ކަމަށެވެ.
ނަމަވެސް ސްކަލޯނީއާ ހަވާލާދީ އީއެސްޕީއެންއިން ބުނެފައިވަނީ ގައުމީ ޖާޒީ ބާލަން ސްކަލޯނީ ނިންމާ ސަބަބަކީ އަބަދު މޮޅުނުވެވޭނެ ކަމަށް ގަބޫލުކުރާތީ އެވެ. އޭނާގެ ކޯޗުކަމުގައި އާޖެންޓީނާ ވަނީ 2021 ވަނަ އަހަރުގެ ކޮޕާ އެމެރިކާ ކާމިޔާބުކޮށް، މިދިޔަ އަހަރުގެ ވޯލްޑްކަޕާއި ފައިނަލިސިމާ ކަޕްގެ ތަށި ވެސް ހޯދައިފަ އެވެ. މި ދެ އަހަރެއްހާ ދުވަހުގެ ތެރޭގައި ބަލިނުވެ އޮތް ޓީމު އެންމެ ފަހުން ބަލިވީ މީގެ ހަފުތާއެއްކުރިން ވޯލްޑްކަޕް ކޮލިފައިންގަ އެވެ.
ކުރީގެ ޑިފެންޑަރު ސްކަލޯނީ ގައުމީ ކޯޗުކަމާ ހަވާލުވީ 2018 ވަނަ އަހަރު އެވެ.
