ޤައުމީ ޓީމުން ފުރުސަތު ނުލިބުމަކީ މެސީ އަށް އޮތް ހިތާމައެއް!

އަނިޔާގެ ސަބަބުން އާޖެންޓީނާގެ ޤައުމީ ޓީމުން ފުރުސަތު ގެއްލުނުއިރު، އެއީ އޭނާ އަށް އޮތް ހިތާމައެއް ކަމަށް އެ ޓީމުގެ ކެޕްޓަން ލިއޮނަލް މެސީ ބުނެފި އެވެ.

ފީފާ ވޯލްޑް ކަޕް ކޮލިފިކޭޝަންގައި މި މަހު އާޖެންޓީނާ އިން ދެ މެޗު ކުޅޭނެ އެވެ. އެގޮތުން ފުރަތަމަ މެޗުގައި މި މަހުގެ 22 ވަނަ ދުވަހު ނިކުންނާނީ އުރުގުއޭއާ ދެކޮޅަށެވެ. އަދި ދެ ވަނަ މެޗުގައި މި މަހުގެ 26 ވަނަ ދުވަހު ނިކުންނާނީ ބްރެޒިލްއާ ދެކޮޅަށެވެ.

އެ ދެ މެޗަށް އާޖެންޓީނާގެ ކޯޗު ލިއޮނަލް ސްކަލޯނީ އެކުލަވާލި ސްކޮޑުން މެސީ އަށް ފުރުސަތު ދީފައެއް ނުވެ އެވެ. އެއީ މެސީ އަށް ލިބިފައިވާ އަނިޔާއެއްގެ ސަބަބުންނެވެ.

އެކަމާ ގުޅިގެން މެސީ ބުނެފައި ވަނީ، އުރުގުއޭ އަދި ބްރެޒިލާ ދެކޮޅަށް ކުޅޭ ދެ މެޗަކީ ވެސް ވަރަށް މުހިންމު ދެ މެޗު ކަމަށާއި، އެ ދެ މެޗުގައި ކުޅެވޭ ގޮތް ނުވުމަކީ އޭނާ ހިތާމަ ކުރާ ކަމެއް ކަމަށެވެ.

އެ ދެ މެޗުގައި ވެސް ކުޅެން އޭނާ ބޭނުންވެފައި ހުރި ކަމަށާއި، ނަމަވެސް ކުޑަ އަނިޔާއެއްގެ ސަބަބުން އޭނާ އަށް އެ މެޗުގައި ނުކުޅެވި، އަރާމު ކުރަން ޖެހިފައިވާ ކަމަށް މެސީ ބުންޏެވެ.

އިތުރަށް މެސީ ބުނީ އެ ދެ މެޗުގައި އޭނާ އަށް ނުކުޅެވުނު ނަމަވެސް، އޭނާ ހުންނާނީ އާޖެންޓީނާގެ ޤައުމީ ޓީމާ އެކު ކަމަށެވެ. އެގޮތުން އެހެން ސަޕޯޓަރުންނެކޭ ވެސް އެއްފަދައިން، ޓީމަށް ސަޕޯޓު ދިނުމުގައި އޭނާ ހުންނާނެ ކަމަށް މެސީ ބުންޏެވެ.

މެސީ އަށް އަނިޔާވެފައި ވަނީ މޭޖާ ލީގު ސޮކާ (އެމެރިކާ ލީގު) ގައި އިންޓަ މިއާމީން އެޓްލަންޓާ ޔުނައިޓެޑާ ދެކޮޅަށް ކުޅުނު މެޗުގަ އެވެ. ފައިގެ މަސްގަނޑަަށް ލިބުނު އެ އަނިޔާގެ ސަބަބުން، އަންގާރަ ދުވަހު މެސީގެ އިތުރު ޓެސްޓުތަކެއް ހަދާނެ ކަމަށް މިއާމީން އޮތީ ބުނެފަ އެވެ.

ކޮލިފިކޭޝަންގެ ދެކުނު އެމެރިކާ ސަރަހައްދުގެ އެއް ވަނައިގައި އޮތީ އާޖެންޓީނާ އެވެ. އެއީ މިހާތަނަށް އެ ޓީމު ކުޅެފައިވާ 12 މެޗުން 25 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އުރުގުއޭ އަށް ލިބެނީ 20 ޕޮއިންޓެވެ.

އެ ދެ މެޗުގައި މެސީ އަށް ނުކުޅެވޭއިރު، ދެން އެންމެ އަވަހަށް ވެސް އޭނާ ފެންނާނެ ކަމަށް ލަފާ ކުރެވެނީ މި މަހުގެ 30 ވަނަ ދުވަހު އެމެރިކާ ލީގުގައި މިއާމީން ފިލަޑެލްފިއާއާ ދެކޮޅަށް ކުޅޭ މެޗުގަ އެވެ. ނަމަވެސް، އެ މެޗުގައި ވެސް މެސީ ފެންނާނެކަން ޔަގީން ވާނީ އޭނާގެ އަނިޔާގެ ރިކަވަރީ ކުރިއަށްދާ ގޮތަކުންނެވެ.