ފީފާ ވޯލްޑް ކަޕް ކޮލިފިކޭޝަންގެ ދެކުނު އެމެރިކާ ސަރަހައްދުގައި އުރުގުއޭއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން އާޖެންޓީނާ އިން އެއް ވަނައިގައި ލީޑު ފުޅާ ކޮށްފި އެވެ.

ހޮނިހިރު ދުވަހުގެ ފަތިހު އުރުގުއޭއާ ދެކޮޅަށް ކުޅުނު މެޗު އާޖެންޓީނާ އިން ކާމިޔާބު ކުރީ 1-0 އިންނެވެ. މެޗުގައި އާޖެންޓީނާ އިން އެ ޓީމުގެ ހަމައެކަނި ލަނޑު ޖެހީ ވެސް ދެ ވަނަ ހާފުގަ އެވެ.

މި މެޗުގައި އަނިޔާގެ ސަބަބުން އާޖެންޓީނާގެ ކެޕްޓަން ލިއޮނަލް މެސީގެ އިތުރުން، އެ ޓީމުގެ ފޯވާޑު ލައުޓާރޯ މާޓިނޭޒް ނުކުޅެ އެވެ. މީގެ ތެރެއިން މާޓިނޭޒް އަށް މެޗު ގެއްލުނީ، ޓީމުގެ ފަރިތަކުރުން ތަކުގައި ވެސް ބައިވެރި ވަމުން އަންނަނިކޮށެވެ.

މެޗުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތު ލިބިފަ އެވެ. އެގޮތުން އުރުގުއޭގެ ފަކުންޑޯ ޕެލިސްޓްރީ އަދު ޑާވިން ނޫނޭޒް އަށް ވަނީ ލަނޑު ޖަހާނެ ފުރުސަތު ލިބިފަ އެވެ. އާޖެންޓީނާގެ ހޫލިއަން އަލްވަރޭޒް އަށް ވަނީ ލަނޑު ޖަހާނެ ފުރުސަތު ލިބިފަ އެވެ.

މެޗުގެ ދެ ވަަނ ހާފުގައި އާޖެންޓީނާ އިން ވަނީ ލަނޑު ޖަހައި ލީޑު ނަގައިފަ އެވެ. މެޗުގެ 68 ވަނަ މިނެޓުގައި އެ ލަނޑު އެ ޓީމަށް ޖަހައިދިނީ ތިއާގޯ އަލްމަޑާ އެވެ. އެއީ އަލްވަރޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އާޖެންޓީނާގެ ނިކޯ ގޮންޒާލޭޒް އަށް ވަނީ ސީދާ ރަތް ކާޑު ދައްކައި ދަނޑުން ފޮނުވާލައިފަ އެވެ.

މޮޅާއެކު މި ސަރަހައްދުގެ އެއް ވަނައިގައި އާޖެންޓީނާ އޮތީ، މިހާތަނަށް އެ ޓީމު ކުޅެފައިވާ 13 މެޗުން 28 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އެކުއެޑޯ އަށް ލިބެނީ 22 ޕޮއިންޓެވެ. ތިން ވަނައިގައި ބްރެޒިލް އަށް 21 ޕޮއިންޓު ލިބޭއިރު، ހަތަރު ވަނައިގައި އުރުގުއޭ އަށް ލިބެނީ 20 ޕޮއިންޓެވެ.

ކޮލިފިކޭޝަންގަައި ދެން އާޖެންޓީނާ ނިކުންނާނީ ބްރެޒިލްއާ ދެކޮޅަށެވެ.