އާޖެންޓީނާ ޤައުމީ ޓީމަށް ކުޅެމުން އަންނަ ލައުޓާރޯ މާޓިނޭޒް އަށް އަނިޔާވެ، ޓީމާ ދުރަށް ދާން ޖެހިއްޖެ އެވެ.

ފީފާ ވޯލްޑް ކަޕް ކޮލިފިކޭޝަންގައި އާޖެންޓީނާ އިން އުރުގުއޭ އަދި ބްރެޒިލާ ދެކޮޅަށް ކުޅޭ މެޗަށް އެކުލަވާލި ސްކޮޑުން ވަނީ މާޓިނޭޒް އަށް ފުރުސަތު ދީފަ އެވެ. އޭނާ އަންނަނީ އިޓަލީގެ އިންޓަރ މިލާންގައި ވެސް މޮޅު ކުޅުމެއް ދައްކަމުންނެވެ.

އާޖެންޓީނާގެ ސްކޮޑުގައި މާޓިނޭޒް ހިމެނިއިރު، އޭނާ ހުރީ ކޮންމެ ވެސް ވަރެއްގެ އަނިޔާއެއްގަ އެވެ. އެގޮތުން ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި އިންޓަރ މިލާނުން ކުޅުނު މެޗުގައި އޭނާ ނުކުޅެ އެވެ. ނަމަވެސް އޭގެ ފަހުން އިޓާލިއަން ލީގުގައި ކުޅުނު މެޗާއި، ޗެމްޕިއަންސް ލީގުގެ ގަދަ 16ގެ ދެ ވަނަ ލެގުގެ މެޗުގައި އޭނާ ކުޅުނެވެ.

މާޓިނޭޒް، އާޖެންޓީނާގެ ޤައުމީ ޓީމު ދޫކޮށް ދުރަން ދާން ޖެހުނީ ވާއަތު ފައިގެ ފަލަމަސްގަނޑަށް ލިބިފައިވާ އަނިޔާގެ ސަބަބުންނެވެ. އެހެންކަމުން، އުރުގުއޭއާ ދެކޮޅަށް ކުޅޭ މެޗުގެ އިތުރުން، ބްރެޒިލްއާ ދެކޮޅަށް ކުޅޭ މެޗުގައި ވެސް މާޓިނޭޒް އަށް ނުކުޅެވޭނެ އެވެ.

އަނިޔާގެ ސަބަބުން މާޓިނޭޒް އަށް ޤައުމީ ޓީމާ ދުރަށް ދާން ޖެހުނުއިރު، އެ ދެ މެޗުގައި އާޖެންޓީނާގެ ކެޕްޓަން ލިއޮނަލް މެސީ އަށް ވެސް ނުކުޅެވޭނެ އެވެ. މެސީ އަށް ވެސް ނުކުޅެވެނީ އޭނާ އަށް ލިބިފައިވާ އަނިޔާގެ ސަބަބުންނެވެ.

ކޮލިފިކޭޝަންގެ ދެކުނު އެމެރިކާ ސަރަހައްދުގެ އެއް ވަނައިގައި އޮތީ އާޖެންޓީނާ އެވެ. އެއީ މިހާތަނަށް އެ ޓީމު ކުޅެފައިވާ 12 މެޗުން 25 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އުރުގުއޭ އަށް ލިބެނީ 20 ޕޮއިންޓެވެ.

އުމުރުން 27 އަހަރުގެ މާޓިނޭޒް ވަނީ މިހާތަނަށް އާޖެންޓީނާ ޤައުމީ ޓީމަށް ކުޅެދިން 70 މެޗުގައި 32 ލަނޑު ޖަހައިފަ އެވެ. އޭނާ އަކީ އާޖެންޓީނާ ޤައުމީ ޓީމުގައި، އެ ޓީމުގެ ކޯޗު ލިއޮަނަލް ސްކަލޯނީ އިސްކަން ދެމުން އަންނަ ކުޅުންތެރިންގެ ތެރޭގައި ވެސް ހިމެނޭ ކުޅުންތެރިޔެކެވެ.