މާލެ ސިޓީ ކައުންސިލުގެ ހުސްވެފައިވާ މަޤާމުތަކަށް އެމްޑީޕީގެ 4 މެންބަރަކު ވާދަކުރައްވަނީ
3 ޑިސެމްބަރު 2023 | އާދީއްތަ 05:06ކުރިމަތިލާފައިވަނީ ކޮންމެ ދާއިރާއަކަށްވެސް އެއް ކެންޑިޑޭޓު
މާލެސީޓީގެ މޭޔަރު ކަމަށް އެމްޑީޕީން ކުރިމަތިލައްވާފައިވަނީ އެމްޓީސީސީގެ ކުރީގެ ސީއީއޯ އާދަމް އާޒިމް
މާލެ ސިޓީކައުންސިލުގެ ހުސްވެފައިވާ މަޤާމުތަކަށް އެމްޑީޕީގެ 4 މެންބަރަކު ވާދަކުރައްވާކަން އެ ޕާޓީން އިއުލާނުކޮށްފިއެވެ.
އެމްޑީޕީން ބުނީ، މާލެ ސިޓީ ކައުންސިލްގައި ހުސްވެފައިވާ މަޤާމްތަކަށް ޝައުޤުވެރިކަން ފާޅުކުރުމަށް ހުޅުވާލި މުއްދަތުގައި ކުރިމަތިލާފައިވަނީ ކޮންމެ ދާއިރާއަކަށް ވެސް އެއް ކެންޑިޑޭޓުކަމުން، ޕްރައިމަރީއަކާއި ނުލައި އެ ފަރާތްތަކަށް ޕާޓީ ޓިކެޓު ޙަވާާލުކުރަން ނިންމާފައިވާކަމަށެވެ.
އެ ޕާޓިން ވަނީ ޝައުޤުވެރިކަން ފާޅުކުރި ކެންޑިޑޭޓުންގެ ނަންތައް ޢާއްމުކޮށް އިއުލާނުކޮށްފައެވެ.
އެގޮތުން މާލޭގެ މޭޔަރުކަމަށް އެމްޓީސީސީގެ ކުރީގެ ސީއީއޯ އާދަމް ޢާޒިމް، މ. ސީނުކަރަންކާގެ / މާލެ ވާދަކުރައްވައެވެ.
އޭގެ އިތުރުން، މެދު ހެންވޭރު ދާއިރާއަށް އަޙްމަދު ރިޝްވާން ރަޝީދު، ހ. ވޭމައުތު / މާލެ، ހެންވޭރު ދެކުނު ދާއިރާއަށް ޙައްވާ ނިޙްލާ ހ. ތަރަބޫޒުގެ / މާލެ، އަދި މާފަންނު ދެކުނު ދާއިރާއަށް އަޙްމަދު ޢިމްރާން، މ. ފަޅުމަތީގެ / މާލެ ވާދަކުރައްވައެވެ.
މާލޭ ސިޓީގެ ހުސްވެފައިވާ މޭޔަރުގެ މަޤާމާއި، މެންބަރުން ހޮވުމަށް ބާއްވާ ބައި އިލެކްޝަން އޮންނާނީ އަންނަ ޖެނުއަރީ މަހުގެ 13 ވަނަ ދުވަހުއެވެ.
