ޔުނައިޓެޑުގެ ފްލައިޓް ކެންސަލްވެ، ބަހުގައި 154 މޭލަށް ދުއްވައިފި

އިނގިރޭސި ޕްރިމިއަރ ލީގުގައި މިރޭ ނިއުކާސަލްއާ ދެކޮޅަށް ކުޅެންޖެހޭ މެޗަށް މެންޗެސްޓަރ ޔުނައިޓެޑުން ދިގު ދަތުރެއް ކުރަން ޖެހިއްޖެއެވެ.

މެންޗެސްޓަރއިން ފުރައިގެން ނިއުކާސަލްއަށް ޔުނައިޓެޑްގެ ކުޅުންތެރިންނާއި ކޯޗިންގ ޓީމު ދާގޮތަށް އޮތީ ފްލައިޓްގައެވެ. ނަމަވެސް ސްނޯގެ ސަބަބުން ފްލައިޓަށް ވަނީ ފުރޭގޮތް ނުވެފައެވެ. މިހެންވެ ޔުނައިޓެޑަށް ޖެހުނީ ބަހުގައި މެޗަށް ދާށެވެ. މެންޗެސްޓަރއިން ފުރައިގެން ބަހުގައި ނިއުކާސަލްއަށް ދިއުމަށް 2 ގަޑިއިރާއި 54 މިނިޓް ހޭދަވެއެވެ. މިއީ 154 މޭލުގެ ދިގުމިނެކެވެ. މިރޭގެ މެޗު ކުޅޭއިރު ނިއުކާސަލްގެ މޫސުން ހުންނާނެކަމަށް ބެލެވެނީ މައިނަސް 1 ޑިގްރީގައެވެ.

ޔުނައިޓެޑްގެ ކުޅުންތެރިން ކާރުގައި އެއާޕޯޓަށް ދިޔައީ މިއަދު ހެނދުނު 10 ޖެހިއިރުއެވެ. ނަމަވެސް ހާލަތު ބަޔާންކޮށް، ބަހުގައި ދަތުރުކުރަންޖެހޭކަން އެންގީ އެ ހިސާބުންނެވެ.

ކޯޗު އެރިކް ޓެންހަގް ބުނީ، މޫސުން ގޯސްވުމުގެ ސަބަބުން މި ސީޒަނުގައި މީގެ ކުރިންވެސް ދެ މެޗެއްގައި އުނދަގޫ ހާލަތު ދިމާވެފައިވާ ކަމަށެވެ. މިހެންވެ ބަހަނާ ނުދައްކައި ބޭނުންވަނީ މެޗަށް އެންމެ ފުރިހަމައަށް ތައްޔާރުވުމަށް ކަމަށެވެ.

ޕްރިމިއަރ ލީގުގައި މިވަގުތު ޔުނައިޓެޑް އޮތީ 24 ޕޮއިންޓާއެކު ހަވަނާގައެވެ. ނިއުކާސަލް އޮތީ 23 ޕޮއިންޓާއެކު ހަތްވަނާގައެވެ.