މެޗު އުނދަގޫވީ ކުރީކޮޅު ގޯސްތަކެއް ހެދުމުން: ކަސްޓްރޯ

ސައުދީ ޕްރޯ ލީގުގައި އަލް ހިލާލާ ދެކޮޅަށް ކުޅުނު މެޗު އުނދަގޫވީ ކުރީކޮޅު ގޯސްތަކެއް ހެދުމުން ކަމަށް، އަލް ނަސްރުގެ ކޯޗު ލުއިސް ކަސްޓްރޯ ބުނެފި އެވެ.

އޭނާ މިހެން ބުނީ، ހުކުރު ދުވަހުގެ ރޭ އަލް ހިލާލް އަތުން ބަލިވި މެޗަށްފަހު ނޫސްވެރިންނާ ވާހަކަ ދައްކަމުންނެވެ. އޭނާ ބުނީ މެޗު ފަށައިގެން ކުރީ ކޮޅު އަލް ހިލާލުން ރަނގަޅަށް ކުޅެ، މެޗުގެ ކޮންޓްރޯލް ނެގުމަށް މަސައްކަތް ކުރި ކަމަށެވެ. އަނެއްކޮޅުން އަލް ނަސްރުގެ ކުޅުންތެރިންނަށް މެޗުގެ ކުރީ ކޮޅު ގޯސްތަކެއް ހެދުނު ކަމަށް ވެސް އޭނާ ވަނީ ބުނެފަ އެވެ. ނަމަވެސް، ކުޅުންތެރިން މަޑު މަޑުން މަސައްކަތްކޮށް، މެޗުގެ ތެރެއަށް ވަންނަން މަސައްކަތް ކުރި ކަމަށާއި، ލަނޑު ޖަހާނެ ފުރުސަތުތަކެއް ތަނަވަސްކުރި ކަމަށް ވެސް އޭނާ ވަނީ ބުނެފަ އެވެ. އިތުރަށް ކަސްޓްރޯ ބުނީ މެޗުގައި ރެފްރީ ވީއޭއާރު ކޮންމެހެން ބަލަން ޖެހޭ ޙާލަތްތަކެއް ވެސް ދިޔަ ކަމަށެވެ. ނަމަވެސް އެކަން ބަހަނާއަކަށް ދައްކަން ބޭނުންނުވާކަން ފާހަގަކޮށް އޭނާ ބުނީ، އަލް ހިލާލަށް ލިބުނީ ހައްގު މޮޅެއް ކަމަށެވެ.

މީގެ އިތުރުން ކަސްޓްރޯ ބުނީ، ދިގު ދެމިގެންދާ ލީގެއްގައި ބާކީ މެޗުތަކެއް އޮތް ކަމަށެވެ. އެހެންކަމުން ކުރިއަށް އޮތް ތަނުގައި ހެދޭ ގޯސްތައް ރަނގަޅުކޮށް، މެޗުތަކުން ރަނގަޅު ނަތީޖާއެއް ނެރުމަށް މަސައްކަތް ކުރާނެ ކަމަށް ވެސް އޭނާ ވަނީ ބުނެފަ އެވެ. އޭނާ ފާހަގަ ކުރި ގޮތުގައި އެއް ވަނައިގައި އޮންނަ ޓީމަކާ ދެމެދު ފަރަގު ބޮޑުވުމަކީ ޗެލެންޖަކަށް ވާނެ އެވެ. ނަމަވެސް އެއީ ކުރިއަށް ދާން މަސައްކަތް ނުކުރަންވީ ސަބަބެއް ނޫން ކަމަށާއި، އޭނާ އާއި އަލް ނަސްރުން މަސައްކަތް ކުރާނީ ކުރިއަށް ދާން ކަމަށް ކަސްޓްރޯ ވަނީ ބުނެފަ އެވެ. ހަމައެހެންމެ ޓީމު ބަލިވެއްޖެ ނަމަ ކަންކަން ގޯސްވާނެކަން ފާހަގަކޮށް އޭނާ ބުނީ، މޮޅުވާ ދުވަހެއްގައި ނެގެޓިވް ކަންކަން ވެސް ފެންނަނީ ރަނގަޅު ގޮތެއްގަައި ކަމަށެވެ.

އަލް ނަސްރަށް ދެން އޮންނާނީ އޭއެފްސީ ޗެމްޕިއަންސް ލީގުގެ ގުރޫޕް ސްޓޭޖުގެ ފަހު މެޗުގައި އިސްޓިކްލޯލާ ދެކޮޅަށް ކުޅޭ މެޗެވެ. އެ މެޗަށް ފަހު ސައުދީ ލީގުގައި އެ ޓީމު ނިކުންނާނީ އަލް ރިޔާދާ ދެކޮޅަށެވެ.