އަލް ނަސްރު ބަލިކޮށް، އަލް ހިލާލަށް އެއް ވަަނައިގައި ހަތް ޕޮއިންޓުގެ ލީޑެއް

ސައުދީ ޕްރޯ ލީގުގައި ވާދަވެރި އަލް ނަސްރާ ދެކޮޅަށް ކުޅުނު މެޗުން މޮޅުވެ، އަލް ހިލާލުން އެއް ވަނައިގައި ލީޑު ފުޅާ ކޮށްފި އެވެ.

ހުކުރު ދުވަހުގެ ރޭ އަލް ނަސްރާ ދެކޮޅަށް ނިކުތްއިރު ވެސް އަލް ހިލާލް އޮތީ އެއް ވަނައިގަ އެވެ. އަލް ހިލާލްގެ މައްޗަށް ކުރި ހޯދައިގެން ފަރަގު ކުޑަ ކުރުމުގެ ފުރުސަތު އަލް ނަސްރަށް އޮތެވެ. ނަމަވެސް، އަލް ހިލާލުން ވަނީ 3-0 އިން މެޗު ކާމިޔާބު ކޮށްފަ އެވެ.

މެޗުގައި އަލް ހިލާލްގެ ތިން ލަނޑު ވެސް އެ ޓީމުން ޖެހީ ދެ ވަނަ ހާފުގަ އެވެ. މެޗުގެ 64 ވަނަ މިނެޓުގައި އަލް ހިލާލަށް ލީޑު ނަގައިދިނީ ސާޖެޖް މިލިންކޮވިޗް ސަވިޗް އެވެ. އޭގެ ފަހުން 89 ވަނަ މިނެޓުގައި އެ ޓީމުގެ ދެ ވަނަ ލަނޑު ޖަހައި، ލީޑު ފުޅާކޮށްދިނީ ސާބިއާގެ ފޯވާޑް އެލެކްސެންޑާ މިޓްރޮވިޗް އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އަލް ހިލާލްގެ ތިން ވަނަ ލަނޑު ވެސް ޖެހީ މިޓްރޮވިޗް އެވެ. އަލް ހިލާލަށް ބަދަލުވި ފަހުން އޭނާ އަންނަނީ މޮޅަށް ކުޅެމުންނެވެ.

މޮޅާއެކު އަލް ހިލާލް ވަނީ އެއް ވަނައިގައި ހަތް ޕޮއިންޓުގެ ލީޑު ނަގައިފަ އެވެ. މިހާތަނަށް ކުޅުނު 15 މެޗުން އެ ޓީމަށް ލިބެނީ 41 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އަލް ނަސްރަށް ލިބެނީ 34 ޕޮއިންޓެވެ.