އާގިލްގެ މަރު: ޚުލާސާ ބަޔާން އިއްވައިފި
ހަމްދޫން ހަމްޒަތާއި، އަލީ މިޖުވާދުގެ މައްޗަށް ކޮށްފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ
އިބްރާހީމް އާގިލް (18އ) މަރާލި މައްސަލައިގައި ދައުލަތުން ދައުވާ އުފުލާފައިވާ ހަމްދޫންއާއި މިޖުވާދު
ގދ. ފަރެސްމާތޮޑާ، ކޮކާ، އިބްރާހީމް އާގިލް (18އ) މަރާލި މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ދައުލަތުން ދައުވާ އުފުލާފައިވަނީ ލ. ފޮނަދޫ، ހިޔާ، ހަމްދޫން ހަމްޒަތާއި، ސ. ހިތަދޫ، ސްވޭހުހީނާގެ، އަލީ މިޖުވާދުގެ އިތުރުން، ހއ. ދިއްދޫ ސްނޯބާޑް، އިބްރާހިމް ވިޝާމްގެ މައްޗަށެވެ.
މި އަޑުއެހުމުގައި ކުރިއަށްދިޔައީ މި މައްސަލައިގައި ދައުވާލިބޭ އަލީ މިޖުވާދު މާލިކުއާއި، ހަމްދޫން ހަމްޒަތުގެ މައްޗަށް ކުރާ ދައުވާގެ ބައެވެ. އެގޮތުން ބުރާސްފަތި ދުވަހުގެ އަޑުއެހުމަކީ ޚުލާސާ ބަޔާން އިއްވުމަށް ބޭއްވި އަޑުއެހުމެކެވެ.
ހަމްދޫން ހަމްޒަތާއި، އަލީ މިޖުވާދުގެ މައްޗަށް ކޮށްފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ.
އާގިލް މަރާލާފައިވަނީ 2018 ވަނަ އަހަރުގެ އޮގަސްޓްމަހުގެ 31 ވަނަ ދުވަހުގެ ރޭ އެމް.އެމް.އޭ ސަރަޙައްދަށް އާގިލް ދަތުރުކުރި ލޯންޗް ކައިރިކުރި ތަނުންނެވެ. އާގިލް އަށް ފަރުވާދިނުމަށް ގެންދިޔަ އޭޑީކޭ ހޮސްޕިޓަލުން އޭރު ބުނެފައިވާ ގޮތުގައި އާގިލް އެހޮސްޕިޓަލަށް ގެންދިޔައީ އެ ރޭގެ 7:30 ހާއިރުއެވެ.
ދައުލަތުން ވަނި ޝަފަހީ 14 ހެކިންނާއި، ކިތާބީ 10 ހެއްކެއް ހުށައަޅާފައެވެ. އަދި ފަހުންވެސް ސިއްރު ހެއްކެއްގެ ގޮތުގައި އިތުރު ހެއްކެއް ހުށައަޅާފައިވެއެވެ.
ދައުލަތުން ޚުލާސާ ބަޔާން އިއްވުމަށްފަހު، ދެން ކުރިއަށް ދިޔައީ ދިފާއުން ޚުލާސާ ބަޔާން އިއްވުމެވެ. ދެން އޮންނާނީ މި މައްސަލަ ސާބިތުވޭތޯ ނުވަތަ ނޫންތޯ ކަނޑައެޅުމާއި ޙުކުމް ކުރެއްވުމެވެ.
މި މައްސަލައިގައި އިބްރާހީމް ވިޝާމްގެ މައްޗަށް އުފުލާފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ. އެ ބައިވެސް ބުރާސްފަތި ދުވަހުގެ މެންދުރަށް ތާވަލު ކުރެވިފައިވެއެވެ.
