ސައޫދީ އަރަބިއްޔާއަކީ ދުނިޔޭގައި މަގްބޫލް ޓުއަރިސްޓް މަންޒިލަކަށް ހެދުމަށް އަމާޒު ކޮށް ޚާއްސަ ކެމްޕެއިނެއް ފަށައިފިއެވެ. މިކެމްޕެއިންގެ ދަށުން އެންމެ ފަހުން ހަރާތްތައް ބާއްވާފައިވަނީ ޗައިނާގައެވެ. ޗައިނާގެ ޝަންގހައި ގައި ބޭއްވި ކެމްޕެއިން ހަރަކާތުގައި 400 ޓްރޭޑް ޕާޓްނަރުންނާ، މީޑިއާ އިންފްލުއެންސަރުންނާ އަދި ޗައިނާގެ އާންމުންގެ ވަރަށް ގިނަ އަދަދެއްގެ ބަޔަކުވަނީ ބައިވެރި ވެފައެވެ. ނޮވެމްބަރުމަހުގެ 17ން 23ށް ބޭއްވުނު ކެމްޕެއިން ހަރަކާތް ފަށާފައިވަނީ ސައޫދީގެ މުއްސަނދި ކަލްޗަރ އަދި ހެރިޓޭޖް ދައްކައިދޭ ޚާއްސަ ޓުއަރިޒަމް މައުރަޒަކުންނެވެ. ހަފްތާއަކަށް ކުރިޔަށް ދިޔަ މައުރަޒް ބަލާލުމަށް 80 ހާހެއްހާ މެހްމާނުން ޒިޔާރަތް ކޮށްފައިވެއެވެ.

މީގެ އިތުރުން ސައޫދީގެ ތަފާތު ކަންކަން ދައްކައިދޭ ފިލްމް ތަކެއްވެސް ޗައިނާގެ ނެޝަނަލް ޓީވީ އާއި ޑިޖިޓަލް ޕްލެޓްފޯމް ތަކުގައި ދައްކާފައި ވެއެވެ. މިފިލްމްތައް ޗައިނާގެ 500 މިލިއަނެއްހާ މީހުން ބަލާފައިވާ ކަމަށް އޮފިޝަލުން މައުލޫމާތު ދީފައި ވެއެވެ.  

ސައޫދީ ޓުއަރިޒަމް އޮތޯރިޓީން ބުނެފައިވާ ގޮތުގައި ޗައިނާގައި ބޭއްވުނު ސައޫދީ ޓުއަރިޒަމް ކެމްޕެއިން އާއި ގުޅިގެން އެޑްވާންސް ބުކިންގ ހެދުން ވަނީ 277 އިންސަތަ އިތުރު ވެފައެވެ.

ސައޫދީ އަރަބިއްޔާއަށް މިއަހަރުގެ މިހާތަނަށްވެސް ޗައިނާގެ އެއްލައްކަޔަށް ވުރެ ގިނަ ޓުއަރިސްޓުން ޒިޔާރަތް ކޮށްފައިވާއިރު، މިހާރު ފަށާފައިވާ ޚާއްސަ ކެމްޕެއިންގެ އަމާޒަކީ 2030ގެ ނިޔަލަށް ޗައިނާއިން އެކަނި، އަހަރަކު 5މިލިއަން ޓުއަރިސްޓުން ގެންދިއުމެވެ.