މަޖިލިސް އިންތިޚާބަށް ޕީޕީއެމް-ޕީއެންސީ ކޯލިޝަންގެ ހުރިހާ ކެންޑިޑޭޓުން ވާދަކުރާނީ ޕީއެންސީގެ ޓިކެޓުގައި: މުއާޒު
އިންތިޚާބަށް ރައީސް މުއިއްޒު ވެސް ނުކުންނެވީ ޕީއެންސީގެ ޓިކެޓުގައި
ޕީޕީއެމްގެ ކައުންސިލް މެންބަރު އަދި މަޑަވެލި ދާއިރާގެ ކުރީގެ މެންބަރު މުއާޒު މުހައްމަދު ރަޝީދު
ކުރިއަށް އޮތް ރައްޔިތުން މަޖިލީހުގެ އިންތިޚާބަށް ޕީޕީއެމް-ޕީއެންސީ ކޯލިޝަންގެ ހުރިހާ ކެންޑިޑޭޓުން ވާދަކުރާނީ ޕީއެންސީގެ ޓިކެޓުގައި ކަމަށް ޕީޕީއެމްގެ ކައުންސިލް މެންބަރު އަދި މަޑަވެލި ދާއިރާގެ ކުރީގެ މެންބަރު މުއާޒު މުހައްމަދު ރަޝީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި މުއާޒު ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރިޔާސީ އިންތިޚާބަށް ނުކުންނެވީ ޕީޕީއެމްގެ ނާއިބު ރައީސް ކަމުގައި ހުންނެވުމަށްފަހު، ޕާޓީން ވަކިވެވަޑައިގަންނަވާ ޕީއެންސީއަށް ސޮއިކުރެއްވުމަށްފަހު، ޕީއެންސީގެ ޓިކެޓުގައި ކަމަށެވެ. އަދި އެގޮތަށް ކަންތައް ކުރެއްވީ ޕާޓީގެ ރައީސް އަބްދުﷲ ޔާމީންގެ އެންގެވުމުގެ މަތީން ކަމަށް މުއާޒު ވިދާޅުވިއެވެ.
މުއާޒު ވިދާޅުވީ ޕީޕީއެމް-ޕީއެންސީއަކީ އެއް ފިކުރެއްގެ އެއްބައެއް ކަމަށާއި، ދެ ޕާޓީގެ އޮފީސް ހިންގަމުން އައީ އެއްތާކު ކަމަށެވެ. ޕީޕީއެމް-ޕީއެންސީއަކީ އެއްބައެއްގެ ގޮތުގައި ގަބޫލުކޮށް ބައެއް ނިންމުންތައް ނިންމާފައިވާ ކަމަށް މުއާޒު ވިދާޅުވިއެވެ. އެގޮތުން އެންމެފަހުން ބޭއްވި ލޯކަލް ކައުންސިލް އިންތިޚާބުގައި ހުރިހާ ކެންޑިޑޭޓުން ވާދަކުރީ ޕީޕީއެމްގެ ޓިކެޓުގައި ކަމަށް މުއާޒު ވިދާޅުވިއެވެ.
ކުރިއަށް އޮތް ރައްޔިތުން މަޖިލީހުގެ އިންތިޚާބަށް އިޝާރާތް ކުރައްވައި މުއާޒު ވިދާޅުވީ ޕީޕީއެމް-ޕީއެންސީ ކުރިއަށްދާނީ އެއްކޮށް ކަމަށެވެ. ނަމަވެސް އިންތިޚާބުގައި ވާދަކުރާ ކެންޑިޑޭޓުން ވާދަކުރާނީ ޕީއެންސީގެ ޓިކެޓުގައި ކަމަށް މުއާޒު ވިދާޅުވިއެވެ. އަދި ވިދާޅުވީ އެއީ ރައީސް މުއިއްޒު ބޭނުންފުޅުވެ ވަޑައިގަންނަވާ ގޮތް ކަމަށެވެ.
ޕީއެންސީގެ ޓިކެޓުގައި ކެންޑިޑޭޓުން މަޖިލިސް އިންތިޚާބަށް ނެރުމަށް ބައެއް ޕީޕީއެމް މެންބަރުން ދެކޮޅު ހަދާކަން ފާހަގަކުރައްވައި މުއާޒު ވިދާޅުވީ އެއީ އެ މީހުންގެ މައްސަލައެއް ކަމަށާއި، އެގޮތަށް ކަންތައް ކުރަނީ އެ ޕާޓީ ބައިބައި ކުރުމުގެ މަގުސަދުގައި ކަމަށެވެ. އަދި ވިދާޅުވީ އެއީ ޕާޓީ މަގުމަތި ކުރަން ބޭނުންވާ ފަރާތްތަކެއް ކަމަށެވެ.
