މޮޅުވާން މަޖުބޫރު މެޗަކަށް، މާޒިޔާ ބަންގްލަދޭޝަށް

އޭއެފްސީ ކަޕުގެ ދެ ވަނަ ބުރަށް ދިއުމަށް ބަންގްލަދޭޝްގެ ބަޝުންދުރަ ކިންގް އަތުން މޮޅުވާން މަޖުބޫރު މެޗު ކުޅެން މާޒިޔާ އެ ގައުމަށް ހިނގައްޖެ އެވެ.

މީގެ ދެ ދުވަސް ކުރިން މާޒިޔާއިން ބަންގްލަދޭޝަށް ދިޔައީ ފުލް ޓީމާއެކުގަ އެވެ. ބިދޭސީ ހަ ކުޅުންތެރިންނާއި ރާއްޖޭގެ ގައުމީ ޓީމުގެ 14 ކުޅުންތެރިން މާޒިޔާގައި އެބަތިއްބެވެ.

މި މެޗަށް ނުކުންނައިރު މާޒިޔާ އޮތީ ތިން ޕޮއިންޓާއެކު ހަތަރު ޓީމު ވާދަކުރާ ގްރޫޕްގެ ފުލުގަ އެވެ. ބަޝުންދުރަ ކިންގް އޮތީ ހަތް ޕޮއިންޓާއެކު ޓޭބަލުގެ ކުރީގަ އެވެ. ބަޝުންދުރަ އާއި އިންޑިޔާގެ މޯހަން ބަގާން ޕޮއިންޓްގެ ގޮތުން ހަމަހަމަވެ، މޯހަން ބަގާން ދެ ވަނަ އަށް ދިޔައީ ފައިދާ ގޯލުގެ ތަފާތުންނެވެ. ތިން ވަނާގައިވަނީ ހަ ޕޮއިންޓާއެކު އިންޑިޔާގެ އޮޑިއްސާ އެވެ. މިހެންވެ މިހާރު ވެސް ދެ ވަނަ ބުރަށް ދިއުމުގެ އަމިއްލަ ބާރެއް މާޒިޔާއަކަށް ނެތެވެ. ބަޝުންދުރަ އާއި މާޒިޔާ މާލޭގައި މި މުބާރާތުގައި ކުޅުނު މެޗުން މޮޅުވީ މާޒިޔާ އެވެ.

މި މެޗުން ބަލިވެއްޖެނަމަ މާޒިޔާ އަށް ދެ ވަނަ ބުރަށް ނުދެވޭނެ އެވެ. އެއީ ބާކީ ކޮންމެ ޓީމަކަށް ވެސް އޮންނާނީ އެއް މެޗު ކަމަށްވާތީ އެވެ.

2013 ވަނަ އަހަރު ރާއްޖޭގެ ނިއުރޭޑިއަންޓް އޭއެފްސީ ކަޕުގެ ކުއާޓާ ފައިނަލަށް ދިޔަ ފަހުން ރާއްޖޭގެ ޓީމަކަށް ގްރޫޕް ސްޓޭޖް ފަހަނައަޅައި ދެވިފައިނުވެ އެވެ.