ޓީސީ ބަލިކޮށް، މާޒިޔާ ފައިނަލަށް

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ކުރިއަށް ގެންދާ، އެފްއޭއެމް ލީގު ކަޕްގެ ފައިނަލްގެ ފުރަތަމަ ޖާގަ މާޒިޔާ ސްޕޯޓްސް އެންޑް ރެކްރިއޭޝަން އިން ހޯދައިފި އެވެ.

މުބާރާތުގެ ލީގު ބުރުގެ އެއް ވަނަ ހޯދައިގެން މާޒިޔާ ސެމީ ފައިނަލްގެ ފުރުސަތު ހޯދިއިރު، ޓީސީ އިން ސެމީ ފައިނަލްގެ ފުރުސަތު ހޯދީ ލީގު ބުރުގެ ހަތަރު ވަނަ ޓީމުގެ ގޮތުގަ އެވެ.

އާދީއްތަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު ސެމީ ފައިނަލް މެޗު މާޒިޔާ އިން ކާމިޔާބު ކުރީ 1-0 އިންނެވެ. އެ ޓީމުން ލަނޑު ޖެހީ މެޗުގެ ފުރަތަމަ ހާފުގަ އެވެ. މުބާރާތުގެ ލީގު ބުރުގައި މި ދެ ޓީމު ބައްދަލު ކުރި މެޗު ވެސް ކާމިޔާބު ކުރީ މާޒިޔާ އިންނެވެ.

މެޗު ފަށައިގެން ވެސް މާޒިޔާ އިން ވަނީ ރަނގަޅަށް ކުޅެ، ޓީސީ ކޮޅަށް ލަނޑު ޖަހަން ފުރުސަތުތަކެއް ތަނަވަސްކޮށްފަ އެވެ. އެގޮތުން މާޒިޔާގެ ހަމްޒާ މުޙައްމަދު (ހަމްޕު)ގެ އިތުރުން، ޙަސަން ރާއިފް އަޙުމަދު ވެސް ވަނީ ލަނޑު ޖަހަން ފުރުސަތު ތަނަވަސްކޮށްފަ އެވެ.

މެޗުގެ ފުރަތަމަ ހާފުގެ 38 ވަނަ މިނެޓުގައި މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. ޓީސީގެ އޭރިޔާ ބޭރުން ލިބުނު ފުރުސަތެއްގައި ގޯލުގެ މަތީ ކަނަށް ބޯޅަ ފޮނުވާލައިގެން މާޒިޔާ އަށް ލީޑު ނަގައިދިނީ ޑިފެންޑަރު ޙުސެއިން ޝިފާއު ޔޫސުފް އެވެ.

މެޗުގައި ޓީސީ އިން ވެސް ވަނީ ލަނޑު ޖަހަން މަސައްކަތްކޮށް، ފުރުސަތުތަކެއް ތަނަވަސްކޮށްފަ އެވެ. މެޗުގެ ނަތީޖާ ހަމަހަމަ ކުރުމަށް ޓީސީ އަށް ފުރުސަތު ވެސް ލިބުނެވެ. ދެ ވަނަ ހާފުގައި ޓީސީގެ މާޔިޒް ވަޙީދު ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއާ އެވެ.

އޭގެ ފަހުން މެޗުގައި ޓީސީ އިން ލަނޑެއް ވެސް ޖެހި އެވެ. އެ ޓީމުގެ އަޝްހަމް އިބްރާހީމް މުޙައްމަދު ލަނޑެއް ޖެހި ނަމަވެސް، އޭނާ އޮފްސައިޑުގައި ހުރުމުން އެ ލަނޑު ބަލައިގަނެފައި ނުވެ އެވެ.

ޓީސީ ބަލިކޮށް މާޒިޔާ އިން މުބާރާތުގެ ފައިނަލްގެ ޖާގަ ހޯދިއިރު، މާޒިޔާ އިން މިހާތަނަށް މުބާރާތުގައި ބަލިވެފައި ނުވެ އެވެ. ލީގު ބުރުގައި ކުޅުނު ހަތަރު މެޗުގެ ތެރެއިން ތިން މެޗުން މޮޅުވެފައިވާއިރު، އެއް މެޗު ވަނީ އެއްވަރުވެފަ އެވެ.