މިހާރު ކުރިއަށްދާ އެފްއޭއެމް ލީގު ކަޕްގެ ލީގު ބުރުގެ ފަހު މެޗުގައި، އޮޑި ސްޕޯޓްސް ކުލަބާ ދެކޮޅަށް ކުޅުނު މެޗުން މާޒިޔާ ސްޕޯޓްސް އެންޑް ރެކްރިއޭޝަން އެއްވަރުވެއްޖެ އެވެ.

މުބާރާތުގައި މާޒިޔާ އިން ކުރިން ކުޅުނު ތިން މެޗުން ވެސް އެ ޓީމު އޮތީ މޮޅުވެފަ އެވެ. އޮޑި ކުރިން ކުޅުނު ތިން މެޗުގެ ތެރެއިން، އެއް މެޗު އެއްވަރުވެފައިވާއިރު، އަނެއް މެޗުން ވަނީ ބަލިވެފަ އެވެ. އަދި އެއް މެޗުން ވަނީ މޮޅުވެފަ އެވެ.

ގަލޮޅު ރަސްމީ ދަނޑުގައި ބުދަ ދުވަހުގެ ހަވީރު ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް އޮޑިންނެވެ. ނަމަވެސް، މާޒިޔާ އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ 23 ވަނަ މިނެޓުގައި އޮޑިން ވަނީ މާޒިޔާ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ހައިސަމް ރަޝީދު އެވެ.

މެޗުގައި މާޒިޔާ އިން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. ނަމަވެސް އެ ޓީމަށް ފުރުސަތުގެ ބޭނުން ނުކުރެވިގެން އުޅެނިކޮށް، ދެ ވަނަ ހާފުގައި އޮޑިން ދެ ވަނަ ލަނޑެއް ވެސް ޖެހި އެވެ. ނަމަވެސް، އެ ލަނޑު ބަލައި ނުގަންނަން ނިންމީ އޮފްސައިޑުގައި ހުރުމުންނެވެ.

އޭގެ ފަހުން މާޒިޔާ އިން ވެސް ވަނީ ލަނޑެއް ޖަހައިފަ އެވެ. މާޒިޔާގެ އަލީ ފާޞިރު (ސެންޓޭ) ޖެހި އެ ލަނޑު ވެސް ބަލައި ނުގަންނަން ނިންމީ އޮފްސައިޑުގައި ހުރުމުންނެވެ.

މާޒިޔާ އިން މެޗުގެ ނަތީޖާ ހަމަހަމަ ކުރީ، ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް، ނަތީޖާ ހަމަހަމަ ކޮށްދިނީ ސެންޓޭ އެވެ.

މި ނަތީޖާ އާއެކު މާޒިޔާ އަށް ވަނީ ލީގު ބުރުގެ އެއް ވަނަ ލިބިފަ އެވެ. އެއީ ލީގު ބުރުގައި ކުޅުނު ހަތަރު މެޗުން 10 ޕޮޮއިންޓާ އެކު އެވެ. މާޒިޔާއާ އެއްވަރުވި އޮޑި އަށް ލިބެނީ ތިން ވަނަ އެވެ. އެއީ ހަތަރު މެޗުން ފަސް ޕޮއިންޓާ އެކު އެވެ.

މުބާރާތުގެ ސެމީ ފައިނަލްގައި މާޒިޔާ ނިކުންނާނީ، ހަތަރު ވަނަ އަށް ދިޔަ ޓީސީ ސްޕޯޓްސް ކުލަބާ ދެކޮޅަށެވެ. އޮޑި ނިކުންނަން ޖެހޭނީ ނިއު ރޭޑިއަންޓް ސްޕޯޓްސް ކުލަބާ ދެކޮޅަށެވެ.