މުއިއްޒު އޮފީހުގައި އިށީންނަވަނީވެސް އަބްދުއްރަހީމަށް ކުރުނީސް އަދާކޮށްފައި: ޖަމީލް
ޖަމީލް އަބްދުއްރަހީމް ސިފަ ކުރެއްވީ ޖާހިލެއްގެ ގޮތުގައި
މަގާމުގެ ފަތްކޮޅު ދެއްވުމަށް ބޭއްވެވި ރަސްމިއްޔާތު
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ހުންނެވީ "ޖާހިލެއްގެ" އަތްދަށު ވެފައި ކަމަށާއި އޮފީހުގައި އިށީންނަވަނީވެސް ކޮންމެ ދުވަހަކު އެމަނިކުފާނުގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲ އަށް ކުރުނީސް އަދާ ކުރައްވާފައި ކަމަށް ކުރީގެ ރައީސް އަބްދުﷲ ޔާމީންގެ ގާނޫނީ ވަކީލު އަދި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ "އަދަދު" ނޫހަށް ހުކުރު ދުވަހު ދެއްވި ހާއްސަ އިންޓަވިއުއެއްގައެވެ. ޖަމީލް ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ ޔާމީންގެ ބޭނުން ކުރައްވައިގެން ކަމަށެވެ. އެގޮތުން، ކުރިން އެމަނިކުފާނާއެކު ހުރިހާ ކަމެއްގައި ވެސް ޕީޕިއެމް ލީޑަރޝިޕުން މަޝްވަރާ ކުރެއްވި ކަމަށާއި ވެރިކަން ލިބުނުގޮތަށް އެކަން ބަދަލުވެފައިވާ ކަމަށް ވިދާޅުވިއެވެ.
ޖަމީލް ވިދާޅުވި ގޮތުގައި ވެރިކަމަށް ވަޑައިގަތުމަށްފަހު ރައީސް މުއިއްޒުވެސް އަދި އެމަނިކުފާނުގެ އެޑްވައިޒަރު އަބްދުއްރަހީމް އަބްދުﷲ ވެސް ޔާމީންގެ ފޯނު ނުނަންގަވައެވެ. ހަތަރު އަހަރުވަންދެން ޔާމީންގެ ނަމުގައި ކެމްޕޭންކޮށް ވެރިކަމަށް އައުމަށްފަހު އެމަނިކުފާނު އެކަހެރި ކުރުން ސިފަވަނީ ލީޑަރޝިޕުން ހިންގާފައިވާ ޚިޔާނާތްތެރިކަމުގެ އަމަލެއް ގޮތުގައި ކަމަށް ވެސް ވިދާޅުވިއެވެ.
އިންސާނަކަށް ހެދޭނެ އެންމެ ބޮޑު ގޯހަކީ "ޖާހިލެއްގެ" އަތްދަށުވުންކަން ފާހަގަކުރައްވައި ޖަމީލް ވިދާޅުވީ ރައީސް މުއިއްޒު ހުންނެވީ އަބްދުއްރަހީމްގެ އަތްދަށުވެފައި ކަމަށެވެ. އަބްދުއްރަހީމަކީ ރައީސް މުއިއްޒުގެ މުރުޝިދު ކަމަށާއި އެމަނިކުފާނު އޮފީހަށް ވަޑައިގަންނަވަނީވެސް އަބްދުއްރަހީމަށް ކުރުނީސް އަދާ ކުރެއްވުމަށްފަހު ކަމަށް ޖަމީލް ވިދާޅުވިއެވެ.
ޖަމީލް ވިދާޅުވީ ޕީޕީއެމްގެ ލީޑަރޝިޕްގެ ބޭފުޅުން ފާއިތުވި ފަސް އަހަރު ތިއްބެވީ ފިނިކޮޓަރީގައި ކަމަށެވެ. މީގެ ތެރޭގައި ރައީސް މުއިއްޒު އާއި އަބްދުއްރަހީމްވެސް ހިމެނިވަޑައިގަންނަވާއިރު އެތަނުގައި ތިއްބަވައިގެން ޔާމީންގެ ދިފާއުގައި މަގުމައްޗަށް ނުކުންނަ ފަރާތްތަކަށް ޖޯކު ޖައްސަވާ ކަމަށް ވެސް ވިދާޅުވިއެވެ.
ޖަމީލް ވިދާޅުވި ގޮތުގައި ޕީޕީއެމް/ޕީއެންސީގެ ލީޑަރޝިޕުން ކުރީގެ ރައީސް އަބްދުﷲ ޔާމީން ދޫކޮށްލެއްވީ ފައިސާ އާއި މަގާމުގެ ދަހިވެތިކަމުގައެވެ.
