އިސްރާއީލާއި ފަލަސްތީނުގެ ހަނގުރާމަވެރި ޖަމާއަތްތަކާ ދެމެދު ހަތަރު ދުވަހުގެ މުއްދަތަށް ހަނގުރާމަ ހުއްޓާލުމަށް ވެފައިވާ އެއްބަސްވުމުގެ ދަށުން، ފަލަސްތީނުގެ ބަންދު ވެފައިވާ ސަރަޙައްދުތަކަށް ކާބޯތަކެއްޗާއި ބޭހާއި ކައްކާ ގޭހާއި އެހީއަށް ބޭނުންވާ އެހެނިހެން ތަކެތި ފޯރުކޮށްދިނުމުގެ ގޮތުން މިދިޔަ ހަފުތާ ބަންދުގައި ޣައްޒާއަށް އިންސާނީ ސަޕްލައި ޓްރަކްތައް ވަދެއްޖެ އެވެ.
އދ.ގެ ރެފިއުޖީ އެޖެންސީން ބުނީ ވަގުތީ ގޮތުން ހަނގުރާމަ ހުއްޓާލުމުން ޣައްޒާއަށް އެހީގެ ތަކެތި ފޯރުކޮށްދެމުން ދާކަމަށާއި، މިދިޔަ އޮކްޓޫބަރު މަހު ޣައްޒާގެ ބޯޑަރު ބަންދުކޮށްފައި ބޭއްވުމަށްފަހު މިއީ އެންމެ ގިނަ އަދަދެއްގެ އެހީގެ ގާފިލާތައް ޣައްޒާއަށް އެތެރެވި ފުރަތަމަ ފަހަރު ކަމަށެވެ.
ހޮނިހިރު ދުވަހު އާންމުވި ފޫޓޭޖްތަކުން ފެންނަ ގޮތުގައި ޣައްޒާގެ ގިނަ ބަޔަކު ޑިސްޓްރިބިއުޝަން ސެންޓަރުތަކަށް ޖަމާވެ، ކެއްކުމަށް ބޭނުންކުރާ ގޭސް ފުޅިތައް ރީފިލް ކުރުމުގެ އިންތިޒާރުގައި ތިއްބެވެ.
އާއިލާއަށް ކައްކާ ގޭސް ހޯދައިދިން ރަފާގެ ރައްޔިތެއް ކަމަށްވާ އެޒެއްދީން އަބޫ އޮމެއިރާ ބުނި ގޮތުގައި ހުރިހާ ރައްޔިތުން ވެސް ތިބީ އުއްމީދުކޮށް އެކަމަށް ތައްޔާރަށެވެ.
އިސްރާއީލުން ދިން ހަމަލާތަކުގެ ސަބަބުން ޣައްޒާއަށް ބޮޑެތި ގެއްލުންތަކެއް ލިބިފައިވާއިރު، މިހާރުވެސް އުމްރާނީ ބޮޑެތިގެއްލުންތައްވެ، ދިރިއުޅުމުގެ ހާލަތު ގޯސްވެ، މުހިންމު ވަސީލަތްތައް ލިބުން ވަނީ ވަރަށް ދަތި ވެފައެވެ.
ވަގުތީ ސުލްހައިގެ އެއްބަސްވުމުގެ ދަށުން އެހީ ގެނައުމުގެ ހުއްދަ ދިނުމުގެ ގޮތުން ޣައްޒާގެ ބޯޑަރު ހުރަސްކުރާ ސަރަހައްދުތައް އަލުން ހުޅުވާލަން އިސްރާއީލުން ވަނީ އެއްބަސްވެފަ އެވެ.
ހަމަލާ ތައް މެދުކަނޑާލުމުން ސުލުހައިގެ މަޝްވަރާތައް ކުރިއަށް ގެންދެވޭނެ ކަމަށް ދެ ފަރާތުން ވެސް އުންމީދު ކުރެ އެވެ.
