ސްޓޭޓް މިނިސްޓަރުކަމުން މުންއިމް ވެސް ވަކިކޮށްފި
25 ނޮވެމްބަރު 2023 | ހޮނިހިރު 13:03މުއްނިމް ވަކިކުރި ސަބަބެއް ހާމައެއް ނުކުރޭ
ޓުއަރިޒަމް މިނިސްޓްރީގެ ސްޓޭޓް މިނިސްޓަރުކަން އައްޔަންކުރެއްވި މުއްނިމްއާއި ފަތްކޮޅު ހަވާލުކުރައްވަނީ
ކުރީގެ ރައީސް އަބްދުﷲ ޔާމިނަށް ތާއިދުކުރައްވާ ސިޔާސީ ފަރާތްތައް ސަރުކާރުގެ މަގާމްތަކުން ވަކިކުރަމުންދާ ކަމަށް އަޑު ފެތުރިފައިވަނިކޮށް، ޓުއަރިޒަމް މިނިސްޓްރީގެ ސްޓޭޓް މިނިސްޓަރުކަމުން މުންޢިމް އަނީސް ވެސް ވަކިކޮށްފިއެވެ.
މިނިސްޓަރ އޮފް ސްޓޭޓް ފޮރ ޓޫރިޒަމްގެ މަގާމަށް މުންޢިމް އަނީސް އައްޔަން ކުރައްވާފައިވަނީ މި މަހުގެ 21 ވަނަ ދުވަހުއެވެ. މިއީ ސަރުކާރުގެ ސިޔާސީ މަގާމަކުން ވަކިކުރި ދެވަނަ ބޭފުޅާއެވެ. މުންޢިމް ވަކިކުރައްވާފައިވަނީ ވެސް ސިޔާސީ ގޮތުން ހިޔާލު ތަފާތުވުންތަކެއް އޮވެގެން ކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ.
މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން އިބްރާހިމް ހަލީލު ރާއްޖެއެމްވީއަށް މައުލޫމާތު ދެއްވަމުން ވިދާޅުވީ މުންޢިމް އަނީސް މަގާމުން ވަކިކުރައްވާފައިވަނީ ބުރާސްފަތި ދުވަހު ކަމަށެވެ. ސަބަބެއް ހާމައެއް ނުކުރައްވައެވެ. ވިދާޅުވީ ވަކިކުރެއްވީ ރައީސުލްޖުމްހުރިއްޔާއަށް ލިބިވަޑައިގަންނަވާ ބާރުގެ ދަށުން ކަމަށެވެ.
މުންޢިމް އަނީސް މަގާމުން ވަކިކޮށްފައިވާއިރު، މިނިސްޓަރ އޮފް ސްޓޭޓް ފޮރ ފޮރިން އެފެއާޒް، މުހައްމަދު ފަހުމީ ހަސަން ވެސް ވަނީ މަގާމުން ވަކިކޮށްފައެވެ.
ފަހުމީއަކީ ރައީސް ޔާމީނަށް ތާއިދުކުރައްވާ އަދި ރައީސް ޔާމިނާވެސް ގާތް ބޭފުޅެކެވެ. ރާއްޖެއެމްވީއަށް މައުލޫމާތު ލިބިފައިވާ ގޮތުގައި، ޕީޕީއެމާއި ޕިއެންސީގެ ތެރޭގައި ހިޔާލުތަފާތުވުންތަކެއް އުފެދި ރައީސް ޔާމިނާއި ރައީސް މުއިއްޒުއާއި ދެމެދު އޮތް ގުޅުން ހީނަރުވެ، ރައީސް ޔާމީން ޕީޕިއެމުން ވަކިވެވަޑައިގެންނުވުމާއެކު، އެމަނިކުފާނަށް ތާއިދުކުރައްވާ މި ސަރުކާރުގެ ސިޔާސީ މަގާމުތަކުގައި ތިބި ބައެއް ފަރާތްތައް މަގާމުން ވަކިކުރުމަށް ވަނީ ނިންމާފައެވެ.
މީގެ ތެރޭގައި ވަޒީރުންގެ ތެރޭގައި ހިމެނޭ ބައެއް ބޭފުޅުންނާއި، މިނިސްޓްރީތަކުގެ ސްޓޭޓް މިނިސްޓަރުންނާއި ޑެޕިއުޓީންގެ ތެރެއިން ބައެއް ބޭބޭފުޅުން މަގާމުން ވަކިކުރުމަށް ވަނީ ނިންމާފައެވެ. މީގެ އިތުރުން ވަޒީރުންގެ ތެރެއިން ރައީސް ޔާމިނަން ތާއިދުކުރައްވާ ވަޒީރުންނަށް ރުހުން ނުދޭން އެމްޑީޕީއާއެކު މަޝްވަރާވެސް ކޮށްފައިވާ ކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ.
ނަމަވެސް ރައީސް ޔާމިނަށް ތާއިދުކުރައްވާ ސިޔާސީ ފަރާތްތައް ސަރުކާރުގެ މަގާމުތަކުން ވަކިކުރަން އުޅޭ ވާހަކަ ހަލީލު ވަނީ ދޮގުކުރައްވާފައެވެ.
