ކުރިއަށް އޮތް ހަފުތާތެރޭގައި މާލެ ސިޓީ ކައުންސިލުގެ ބައި އިލެކްޝަން އިއުލާން ކުރާނެ
މޭޔަރުކަމުގެ މަގާމު ހުސްވެފައިވަނީ ޑރ. މުއިއްޒު، ރައީސުލްޖުމްހޫރިއްޔާކަމުގެ މަގާމަށް އިންތިޚާބުވެވަޑައިގަތުމުން
އިލެކްޝަންސް ކޮމިޝަންގެ ރައީސް، އިސްމާއީލް ހަބީބު
ކުރިއަށް އޮތް ހަފުތާއެއްހާ ދުވަހުގެ ތެރޭގައި މާލެ ސިޓީ ކައުންސިލުގެ ބައި އިލެކްޝަން ބާއްވަން އިއުލާންކުރާނެކަމަށް އިލެކްޝަންސް ކޮމިޝަނުން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބް ވިދާޅުވީ، މާލޭ މޭޔަރާއި، މާލެ ސިޓީ ކައުންސިލްގެ މެމްބަރުންގެ ގޮނޑި ހުސްވެގެން ބައި އިލެކްޝަންސް ބާއްވަން ބޭނުންވާ މައުލޫމާތު މިހާރު ލޯކަލް ގަވަރމަންޓް އޮތޯރިޓީ (އެލްޖީއޭ)އިން ލިބިފައިވާ ކަމަށެވެ. އެހެންކަމުން އެ އިންތިޚާބަށް، ކުރިއަށް އޮތް ފަސް ދުވަހުގެ ތެރޭގައި އިޢުލާންކުރައްވާނެ ކަމަށްވެސް ހަބީބް ވިދާޅުވިއެވެ.
މާލޭ މޭޔަރުކަމުގެ މަގާމު ހުސްވެފައި ވަނީ ކުރިން އެމަގާމުގައި ހުންނެވި ޑރ. މުއިއްޒު، ރައީސުލްޖުމްހޫރިއްޔާކަމުގެ މަގާމަށް އިންތިޚާބު ވެވަޑައިގަތުމުންނެވެ.
މާލެ ސިޓީގެ ބައި އިލެކްޝަން ޖެނުއަރީ 17ގެ ކުރިން ބާއްވާނެކަމަށް އިލެކްޝަންސް ކޮމިޝަނުން ވަނީ މީގެ ކުރިން ބުނެފައެވެ. ކޮމިޝަނުގެ މައްޗަށް ލާޒިމްވަނީ، ކައުންސިލެއްގެ އިންތިޚާބީ މަގާމެއް ހުސްވާތާ 60 ދުވަހުގެ ތެރޭގައި މެންބަރަކު އެ މަގާމަށް އިންތިޚާބުކުރުމަށެވެ.
