ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޕީއެންސީގެ މެންބަރުންނަށް ބައިލައްކަ ރުފިޔާ ނަގުދު ފައިސާ ދިން ކަމަށް ބުނާ މައްސަލަ އެންޓި ކޮރަޕްޝަން ކޮމިޝަން (އޭސީސީ)އިން ތަހުގީގު ނުކުރާ ކަމަށް އެކޮމިޝަނުން ބުނެފިއެވެ.

ޕީއެންސީގެ މެންބަރުންނަށް ރައީސް މުއިއްޒު 50،000 ރުފިޔާދޭ ވާހަކަ ސަރުކާރުން ދޮގުކުރެއެވެ. ނަމަވެސް އަދަދު ނޫހަށް ޕީއެންސީގެ މެންބަރުން ވަނީ ފައިސާދޭކަން ކަށަވަރުކޮށްދީފައެވެ.

އެމައްސަލައާ ގުޅިގެން އެ މައްސަލަ ތަހުގީގު ކުރޭތޯ ރާއްޖެއެމްވީއިން އޭސީސީގައި ސުވާލު ކުރުމުން އޭސީސީގެ އޮފިޝަލެއް ވިދާޅުވީ އެމައްސަލަ އެއްވެސް ފަރާތަކުން ރަސްމީކޮށް ހުށަހަޅާފައިނުވާ ކަމަށެވެ. އެހެންކަމުން އެމައްސަލަ ތަހުގީގު ނުކުރާނެ ކަމަށެވެ.

ޕީއެންސީގެ މެންބަރުންނަށް ރައީސް މުއިއްޒު 50،000 ރުފިޔާދޭ މައްސަލަ ތަހުގީގު ކުރުމަށް އިދިކޮޅު މެންބަރުން ދަނީ ގޮވާލަމުންނެވެ. ރަސްމީކޮށް އޭސީސީއަށް މައްސަލަ ހުށަނޭޅި ނަމަވެސް އޭސީސީއަކީ މިފަދަ މައްސަލަތައް ތަހުގީގު ކުރަންޖެހޭ މުއައްސަސާއެއް ކަމަށާއި، ރާއްޖޭގެ ނޫހަކުން އެ މައްސަލަ ރިޕޯޓު ކުރުމުން ތަހުގީގު ކުރަންޖެހޭ ކަމަށް ބައެއް މެންބަރުން ވިދާޅުވެއެވެ.

ޕީއެންސީގެ 75 މެންބަރުން މަޖިލީހުގައި ތިއްބަވާއިރު އެ މެންބަރުންނަށް 50،000 ރުފިޔާ ދޭން މަހެއްގެ މައްޗަށް 3.75 މިލިއަން ރުފިޔާ ހޭދަވާނެ އެވެ. އެ މެންބަރުންނަށް ފައިސާ ދޭ ގޮތް ނޭނގޭއިރު، ރާއްޖޭގެ އިގްތިސާދު ވަނީ ވަރަށް ބޮޑު އަދަވަޅަކަށް ވެއްޓިފައި ކަމަށް ސަރުކާރުން ބުނެއެވެ.