ސަލާމަތީ ހިދުމަތްތަކުން ރައްޔިތުންގެ މަޖިލީހުގެ މަޖިލީހުގެ މަސައްކަތްތަކަށް ހުރަސް އެޅީތީ ޗީފް އޮފް ޑިފެންސް ފޯސް މެޖަރ ޖެނެރަލް އަހްމަދު ޝިޔާމް އާއި ކޮމިޝަނަރ އޮފް ޕޮލިސް އަހްމަދު އަރީފްގެ މައްޗަށް މަޖިލީހުގެ ތެރެެއިން އެޅެންހުރި ފިޔަވަޅުތައް އަޅާނެ ކަމަށް ގުޅިފައިވާ ޕާޓީތަކުން ބުނެފި އެވެ.
މަޖިލީހުގައި ތަޅުއަޅުވައި އަދި ތަޅުއަޅުވާފައި ހުއްޓައި މަޖިލީހުގެ ތެރެއަށް ވެންނެވި މެމްބަރުންނަށް އަނިޔާކޮށް މަޖިލީހުން ހޯމަ ދުވަހު ބޭރުކޮށްފައިވާއިރު، މ.ކުނޫޒްގައި ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޕީޖީ ގްރޫޕްގެ ލީޑަރު، ހިންނަވަރު އިބްރާހިމް މުހައްމަދު ސޯލިހު ވިދާޅުވީ، މަޖިލީހަށް ގުޅިފައިވާ ސިޔާސީ ޕާޓީތަކުގެ މެންބަރުން ގޮސްފައިވަނީ މަޖިލީހުގެ އަމީންއާންމާއި ބައްދަލުކުރުމަށް ކަމަށާއި އެކަން ކުރުމަށް އަމީންއާންމުގެ އެޕޮއިންޓްމެންޓަކަށް އެދި އެޕޮއިްނޓްމެންޓްވެސް ލިބިފައި އޮތް ކަމަށެވެ.
އެހެން ނަމަވެސް، މަޖިލީސް މެންބަރުން މަޖިލީހަށް ވެންނެވުމުން، ފުލުހުންނާއި ސިފައިން މަޖިލީހުގެ މެންބަރުންގެ މަސައްކަތްތަކަށް ހުރަސް އެޅިކަމަށާއި އެއީ ގާނޫނީ ގޮތުން ކުރެއްވޭނެ ކަމެއް ނޫން ކަމަށް އިބޫ ވިދާޅުވި އެވެ.
އިބޫ ވިދާޅުވީ ސިފައިންނާއި ފުލުހުން މެމްބަރުން ނެރުމުގެ މަސައްކަތް ފެށީ، މައިނޯރިޓީ ޕާޓީގެ ލީޑަރުގެ އޮފީހުގައި މެމްބަރުން ތިއްބަވަނިކޮށް ކަމަށެވެ. ފުލުހުން މަޖިލީހަށް ވަނީ، ވަކިކޮށްފައިވާ ކަމަށް ކަނޑައަޅާފައިވާ މެމްބަރުން މަޖިލިހުން ނެރުމަށް ކަމަށް ފުލުހުން ބުނެފައިވާއިރު، އިބޫ ވިދާޅުވީ ފުލުހުން ވަދެ ބުނީ ވަކި މެމްބަރަކު ނެރޭ ވާހަކައެއް ނޫން ކަމަށެވެ.
"އަޅުގަނޑު އިނީ އަޅުގަނޑުގެ އޮފީހުގައި. އެތަނުން ނިކުންނަންވީ ކީއްވެތޯ ސުވާލު ކުރުމުން، އިތުރު ވާހަކައެއް ދައްކާނެ ކަމެއް ނެތް ކަމަށްބުނެ، މަޖިލީހުން ނުކުތުމަށް އެދުނު." އިބޫ ވިދާޅުވި އެވެ.
މަޖިލީހުން މެމްބަރުން ނެރުނު ވީޑިއޯތަކަށް ފެންނަ ގޮތުގައި ވެސް ސިފައިން ފުރަތަމަ ނެރުނީ، އިލެކްޝަންސް ކޮމިޝަނުން ގޮނޑި ގެއްލުވާލާފައިވާ މެމްބަރުންނެއް ނޫނެވެ.
މަޖިލީހުގެ ކުރީގެ ރައީސް އަބްދުﷲ ޝާހިދު ވިދާޅުވީ މަޖިލީހަކީ އިމާރާތެއް ނޫން ކަމަށާއި މަޖިލީހަކީ މެމްބަރުން ކަމަށެވެ. އެ މެމްބަރުންގެ މަސައްކަތަށް ހުރަސް އެޅުމަކީ ގާނޫނާ ހިލާފު ކަމެއް ކަމެއް ކަމަށެވެ.
މަޖިލީހުގެ ގޯތިތެރެ އާއި މަޖިލީހުގެ މުޅި އިމާރާތަށް ހިނގާާނީ މަޖިލީހުގެ ރައީސްގެ ބާރުކަމަށާއި ސަލާމަތީ ހިދުމަތްތަކުން ވެސް މަޖިލީހަށް ވަދެވޭނީ ހުއްދަ ދީގެން ކަމަށެވެ. އަދި އަމަލު ކުރެވޭނީ ވެސް ހުއްދަ ދިން މިންވަރަކަށް ކަމަށްވާއިރު، މަޖިލީހަށް ސިފައިންނާއި ފުލުހުން ވަދެ އަމަލުކުރުމުގައި އެ ގޮތް ފެނިގެން ނުދާ ކަމަށް އޭނާ ވިދާޅުވި އެވެ.
ކުރީގެ ޕޮލިސް ކޮމިޝަނަރު އަބްދުﷲ ރިޔާޒު ވިދާޅުވީ ސަލާމަތީ ހިދުމަތްތަކުން މަޖިލީހުގެ މައްޗަށް އިއްޔެ ގާނޫނާ ހިލާފަށް ގަދަވި ގަދަވުމުގެ ޒިންމާ އެކަން ކުރަން އެންގި މީހުންނާއި އެކަންކުރި މީހުން ޒިންމާ އުފުލަން ޖެހޭނެ ކަމަށެވެ. މިހާރު ހިނގަމުންދާ ބައެއް ޝަރީއަތްތަކަށް ބަލާލިޔަސް، އެކަން އެނގޭނެ ކަމަށް ރިޔާޒު ވިދާޅުވި އެވެ.
