މެއި 6 ޙަމަލާ: ދައުލަތުގެ 3 ހެއްކެއްގެ ހެކިބަސް ނަގައިފި
ޙާދިސާ ހިނގިއިރު ޓްރެފިކް ޕޮލިހެއްގެ ޑިއުޓީގައި އުޅުނު ފަރާތެއް ހެކިބަސް ދިން
ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދަށް އަމާޒުކޮށް ޙަމަލާދިން ސަރަޙައްދު
މެއި 6 2021 ގައި ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާގެ މައްސަލައިގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުމުގައި ކުރިއަށް ދިޔައީ ދައުލަތުގެ ހެކިންގެ ހެކިބަސް ނެގުމެވެ.
ފުރަތަމަ ހާޒިރުކުރި ހެކިވެރިޔާއަކީ ޙާދިސާ ހިނގިއިރު ޓްރެފިކް ޕޮލިހެއްގެ ޑިއުޓީގައި އުޅުނު ފަރާތެކެވެ.
ހެކިވެރިޔާ ބުނީ، ގަލޮޅު ދަނޑުގައި ހުރި ކޯނުތަކެއް ނެގުމުގެ މަސައްކަތުގައި އިތުރު ފުލުހަކާއެކު އުޅެނިކޮށް އެމްއެންޑީއެފްގެ ވެހިކަލެއް ބާރު ސްޕީޑުގައި އައި ކަމަށާއި، އޭޑީކޭއާ ހަމައަށް އެސްކޯޓް ކޮށްދިނުމަށް އެމްއެންޑީއެފުން އެދުނުކަމަށެވެ.
އޭޑީކޭއަށް ގޮސް ސްޓްރެޗަރ ގެނައިރު، އެއީ ނަޝީދުކަން އެނގިލެއްވި ކަމަށާއި، އޭރު ހަށިގަނޑުގެ ތަންތަނުގައި ލެއި ހުރިކަމަށް ހެކިވެރިޔާ ބުންޏެވެ.
ހެކިވެރިޔާ ބުނީ، ހޮސްޕިޓަލުގައި މަޑުކޮށްފައިވާނީ 15 މިނެޓު ވަންދެން ކަމަށެވެ.
ދެން ހާޒިރުކުރި ހެކިވެރިޔާ ބުނީ، އޭނާ ވިއްކާފައިވާ ސައިކަލެއް މި މައްސަލައިގައި ހިމެނޭކަމަށް (އައިއީޑީ ހަރުކޮށްފައިވާ ސައިކަލު) ފުލުހުން ބުނެފައިވާތީ، އޭނާ ފުލުހުންނަށް ބަޔާނެއް ދީފައިވާނެކަމަށެވެ.
އެއީ އޭނާ 4 ވަރަކަށް އަހަރު ގެންގުޅުނު ސައިކަލެއް ކަމަށާއި، އެއަށްފަހު ސޯޝަލް މީޑިއާ ޕްލެޓްފޯމެއްގައި ޖަހައިގެން ސައިކަލު ވިއްކާލީކަމަށް އޭނާ ބުންޏެވެ.
އަދި ގަތް މީހާ ސައިކަލަށް ލާރި ދައްކާފައިވަނީ ނަގުދު ފައިސާއިން ކަމަށާއި، ސައިކަލު ވިއްކީ 18،000 ރުފިޔާއަށްކަަމަށް އޭނާ ބުންޏެވެ.
ސައިކަލު ގަތް މީހާއާ ދެ ދުވަހެއްގައި ދިމާވި ކަމަށާއި، ފުރަތަމަ ދުވަހު ސައިކަލު ޓެސްޓުކޮށް، ދެވަނަ ދުވަހު ނަގުދު ފައިސާއިން ލާރި ދީފައިވާކަމަށް އޭނާ ބުންޏެވެ.
ހެކިވެރިޔާ ބުނި ގޮތުގައި އޭނާ ސައިކަލު ވިއްކީ، ސައިކަލު ވިއްކަން ސޯޝަލް މީޑިއާގައި ޖެހުމުން، ފޯނުން ގުޅައިގެން މުއާމަލާތު ކުރި މީހަކަށެވެ. އޭނާ ގާތުގައި ރަޖިސްޓްރީ ކުރުމަށް އައިޑީކާޑު ފޮނުވަން އެދުމުން ފޮނުވީ ތަހުމީނުގެ އައިޑީކާޑު ކަމަށްވެސް އެ ހެކިވެރިޔާ ބުންޏެވެ. އެއީ ތަހުމީނުކަން އެނގުނީ މި މައްސަލަ ފެންމަތިވުމުންކަންވެސް ހެކިވެރިޔާ ފާހަގަކުރިއެވެ.
ނަމަވެސް ސައިކަލު ވިއްކިފައިވަނީ ސީދާ ތަހުމީނަށްކަން ކަށަވަރު ކުރުމަށް އިތުރު ކަމެއް ކޮށްފައިނުވާނެކަމަށާއި، ސަބަބަކީ އޭރު މުއާމަލާތުގެ ކަންކަން ނިމިފައިވާތީކަމަށް އޭނާ ބުންޏެވެ.
ހެކިވެރިޔާ ބުނި ގޮތުގައި އެ މުއާމަލާތް ހިންގިފައިވަނީ މާލެއާއި ހުޅުމާލެއާ ދެމެދު ބްރިޖު އަޅައިގެން ދަތުރުކުރަންފެށި ދުވަސްވަރުގައެވެ.
އޭނާ މި ސައިކަލު ވިއްކިކަމާއި، އޭގެ ފަހުން އެހެން ސައިކަލެއް ދުއްވިކަން އެނގޭނެ ހެކިން ތިބޭނެކަމަށްވެސް އޭނާ ބުންޏެވެ.
މި އަޑުއެހުމުގައި ދިފާއީ ވަކީލު ވަނީ ތަހުމީނު ދައްކައި، އެއީ ހެކިވެރިޔާއާ ދިމާވެފައިވާ ނުވަތަ ދަންނަ މީހެއްތޯ ސުވާލު ކުރައްވާފައެވެ. އޭގެ ޖަވާބުގައި ހެކިވެރިޔާ ބުނީ، ތަހުމީނަކީ އޭނާ ދަންނަ މީހެއް ނޫން ކަމަށާއި، ދިމާވެފައިވޭތޯ ނުވަތަ ނޫންތޯ މިހާރު ޔަޤީންކަމާއެކު ބުނެވެން ނެތްކަމަށެވެ. ޝަރީއަތުގައި ފެންނަން ހުރި ތަހުމީނާ، އޭނާއާ ދިމާވި މީހާއާ ސިފަތައް އެއްވެސް ވަރަކަށް ވައްތަރުކަމެއް ނެތްކަމަށްވެސް އެ ހެކިވެރިޔާ ބުންޏެވެ.
ހެކިވެރިޔާ ވަނީ މިހާރު ބައެއް ކަންކަން ހަނދާނުގައި ނެތްކަމަށްވެސް ބުނެފައެވެ.
ތަހުގީގުގައިވެސް ވަކި މީހަކު ދަންނަންތޯ ބެލުމަށް ފުލުހުންގެ ފަރާތުންވެސް ފޮޓޯ ރިޕޯޓެއް ދައްކާފައިނުވާކަމަށް އެ ހެކިވެރިޔާ ބުންޏެވެ.
ތިންވަނައަށް ހާޒިރުވެފައިވަނީ ޙާދިސާ ހިނގިއިރު ނީލޯފަރުމަގުގައި ހުރި ފަރާތެކެވެ.
ހެކިވެރިޔާ ބުނީ، އޭނަ ހިނގަމުން ދިޔައީ ނަޝީދުގެ ފަހަތުން ކަމަށެވެ. ނަޝީދު ކާރުކޮޅުގެ ދޮރު ހުޅުވާލެއްވިތަން ފެނުނު ކަމަށާއި، ދެން އިވުނީ ބާރުގަދަ އަޑެއްކަމަށް އޭނާ ބުންޏެވެ. އޭރު ކާރުކޮޅު އޮތީ މަޖީދީމަގާއި ނީލޯފަރު ހިނގުމަށްވާ މަގުގައިކަމަށް އޭނާ ބުންޏެވެ.
އެއާއެކު އެމްއެންޑީއެފް ސިފައިން ނަޝީދު އަތްދަނޑިމައްޗަށް ނަންގަވައިގެން އެމްއެންޑީއެފްގެ ކާރަށް އެރުވުމަށް ދިޔަތަން ފެނުނުކަމަށް ހެކިވެރިޔާ ބުންޏެވެ.
މުޅި ތަނުގައި ބޯކޮށް ދުމުގެ އަސަރުވެސް ހުރި ކަމަށާއި، ނަޝީދުގެ އިތުރުންވެސް އިތުރު ފަރާތަކަށް އަނިޔާވެގެން އުޅުނު މަންޒަރު ފެނުނުކަމަށް އޭނާ ބުންޏެވެ.
ދެން އޮންނަ އަޑުއެހުމެއްގައިވެސް އޮންނާނީ ދައުލަތުގެ ހެކިންގެ ހެކިބަސް ނެގުމެވެ.
