3 މިލިއަން ރުފިޔާ ހަރަދުކޮށްގެން މުލީއާގޭގައި ޖިމެއް ހެދުން - ސަރުކާރުން އެކަން ދޮގުކުރޭ
މުލިއާގޭގެ ޖިމެއް ހަދަން ނުވަތަ ކުރިން ހުރި ޖިމެއް މަރާމާތު ކުރުމަށް ވެސް އިއުލާނެއް ކޮށްފައި ނުވޭ
މުލިއާގޭގައި 3 މިލިއަން ހަރަދުކޮށްގެން ޖިމެއް ވަނީ ހަދާފައި
3 މިލިއަން ރުފިޔާ ހަރަދުކޮށްގެން މުލިއާގޭގައި ޖިމެއް ހެދިކަން ހާމަވެއްޖެއެވެ.
ނަން ނުޖެހުމަށް ޝަރުތުކޮށް، އިތުބާރު ހުރި ފަރާތަކުން ރާއްޖެއެމްވީއަށް މައުލޫމާތުދެއްވަމުން ވިދާޅުވީ، މުލީއާގޭގައި ކުރިން ހުންނަ ޖިމުގެ ބަދަލުގައި އައު ޖިމެއް ހަދަން ބަޔަކާއި ހަވާލުކޮށް މިދިޔަ ހަފްތާގައި އެ މަސައްކަތް ނިންމާލާފައިވާ ކަމަށެވެ. އަދި އެކަމަށް 3 މިލިއަން ރުފިޔާ ހަަރަދުކޮށްފައިވާ ކަމަށާއި، ޖިން ހަދާފައިވަނި ޒަމާނާި ވަސީލަތްތަކާއެކު ކަމަށެވެ.
މި މަސައްކަތް ނިންމާލާފައިވާއިރު، މުލިއާގޭގެ ޖިމެއް ހަދަން ނުވަތަ ކުރިން ހުރި ޖިމެއް މަރާމާތުކުރުމަށްވެސް އިއުލާނެއް ކޮށްފައި ނުވެއެވެ.
މިކަމާއި ގުޅިގެން ސަރުކާރުގެ ބަހެއް ހޯދުމަށް ގުޅާލުމުން ރައީސް އޮފީހުގެ އިސް ތަރުޖަމާނު ހީނާ ވަލީދު ވަނީ ފޯނު ރިންގުވުމުން ވޮއިސްމެއިލްއަށް ކޯލް ފޯވާޑްކޮށްލާފައެވެ. އޭގެ ފަހުން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިލް ހަލީލަށް ގުޅުމުން ވަނީ އެ މައުލުމާތު ސާފުކޮށްދެއްވާފައެވެ.
ހަލީލު ވިދާޅުވީ މި ސަރުކާރު ފެށުނު ފަހުން މުލީއާގޭގައި ހުރި ޖިމެއް ތަރައްގީ ކުރަން އެއްވެސް ކަމެއް ނުކުރާ ކަމަށާއި، އެއްވެސް ހޭދައެއްވެސް ނުކުރާ ކަމަށް ވިދާޅުވިއެވެ. އަދި ރައީސް އިބްރާހިމް މުހައްމަދު ޞާލިހުގެ ސަރުކާރު ނިމުނު އިރު މުލީއާގޭގައި ޖިމެއް ހުރިކަމަށް ހަލީލު ވިދާޅުވިއެވެ. މިއީ އެއިރަކު ހުންނަވާ ރައީސަކު ކަސްރަތު ކުރައްވަން މުލީއާގޭގައި ގާއިމްކޮށްފައި ހުންނަ ތަނެކެވެ.
ނަމަވެސް ރާއްޖެެއެމްވީ އިން ހަލީލު އާއި ކުރި ސުވާލުގެ ސީދާ ޖަވާބެއް ދެއްވާފައި ނުވެއެވެ. ހަލީލު އާއި ސުވާލުކުރެވުނީ ރައީސްގެ ރަސްމީ ގެކޮޅުގައި ޖިމެއް ގާއިމް ކުރި ވާހަކައާއި އެ ޖިމަށް 3 މިލިއަން ހަރަދުވި ކަމަށް މައުލޫމާތު ލިބިފައިވާތީ އެކަން ކަށަވަރު ކޮށްދެއްވުމަށެވެ. ނަމަވެސް މި ސުވާލުގެ ސީދާ ޖަވާބެއް ނުދެއްވާ ހަލީލު ވިދާޅުވެފައިވަނީ އެތަނުގައި ހުރި ޖިމެއް މަރާމާތު ނުކުރާ ވާހަކައެވެ.
ރައީސް މުއިއްޒު ވެރިކަމަށް ވަޑައިގެން ހަރަދު ކުޑަކުރައްވާނެކަމަށް ވިދާޅުވުމަށްފަހު، މުލީއާގެއަށް ވަޑައިގަންނަވަން އެތަން މަރާމާތު ކުރެއްވުމަށް އެކަނި ވެސް އެތައް މިލިއަން ރުފިޔާއެއް ވަނީ ހަރަދުކޮށްފައެވެ. އަދި އެފަހުން މުލީއާގެއަށް ކަރޯކޭ ސިސްޓަމާއި، ޖަކޫޒީ ފަދަ ބައެއް ސާމާނު ގެނެސް ވެއްދި ވާހަކަތައް މުލީއާގޭގައި މަސައްކަތް ކުރާ މުވައްޒަފުންގެ ފަރާތުން އަޑު އިވިފައި އެބަހުއްޓެވެ. ނަމަވެސް ސަރުކާރުން މި ހުރިހާ ކަމެއް ވެސް ދޮގުކުރެއެވެ.
