މުލީއާގެ ސަރަހައްދުގައި ސެކިއުރިޓީ ވަރުގަދަ ކޮށްފައިވާ ކަމަށް ދެކެވޭ ވާހަކަ އެމްއެންޑީއެފުން ދޮގުކޮށްފި

މުލީއާގެ ސަރަހައްދުގައި ސެކިއުރިޓީ ވަރުގަދަކޮށްފަ ނުވާނެ ކަމަށް ގައުމީ ދިފާއީ ބާރު އެމްއެންޑީއެފުން ބުނެފިއެވެ.

ރާއްޖޭގެ މީޑިއާއަކުން ވަނީ މުލީއާގެ ސަރަހައްދުގައި އާއްމުކޮށް ހަރަކާތްތެރިވާ ވަރަށް ވުރެ ގިނަ އަދަދަކަށް ސިފައިން ހަރަކާތްތެރިވާ މަންޒަރު ފެންނަ ވީޑިއޯ އެއް މީސްމީޑިއާގައި ހިއްސާކޮށްފައެވެ.

އަދި މުލީއާގެ ސަރަހައްދުގެ ސަލާމަތީ ކަންކަން ވަރުގަދަކޮށްފައިވާ ކަމަށް ބުނެ މީސްމީޑިއާގައި ވެސް ވަނީ ޚަބަރުފެތުރިފައެވެ.

އެކަމާއި ގުޅިގެން ރާއްޖެއެމްވީން ސުވާލުކުރުން އެމްއެންޑީއެފްގެ މީޑިއާ އޮފިޝަލް ވިދާޅުވި އެ ސަރަހައްދުގައި ޚާއްސަކަމެއް ނުވަތަ އާދަޔާއި ޚިލާފު އެއްވެސް ކަމެއް ނުހިނގާ ކަމަށެވެ.

އަދި މުލީއާގެ އާއި އެ ސަރަހައްދުގައި ވެސް ސަލާމަތީކަންކަން އިތުރަށް ވަރުގަދަކޮށްފައި ނުވާ ކަމަށާއި އެ ވާހަކަތަކަކީ ހަގީގަތެއް ނޫން ކަމަށް އޭނާ ވިދާޅުވިއެވެ.

މުލީއާގެ ސަރަހައްދުގެ ސަަލާމަތީކަންކަން ވަރުގަދަކުރިކަމަށް އަޑު ފެތުރިފައި ވަނީ މާލޭގެ ގޯޅިއެއްގެ ތެރޭގައި ހުރި ޕިކަޕެއްގައި އެއްޗެއް ގޮވިކަމަށް ތުހުމަތުކުރެވިގެން ސިފައިން ދާދިފަހުން ހަރަކާތްތެރިވެފައި ވަނިކޮށެވެ.

ގަލޮޅު ކަންމަތީ އޮތް ވޭނެއްގައި އެއްޗެއް ގޮވައިގެން އުޅޭކަމަށް ބެލެވިގެން އެމްއެންޑީއެފުން ހަރަކާތްތެރިވީ 9 ޖުލައިގައެވެ.

އެހެންނަމަވެސް ސިފައިން ބެލި ބެލުމުން ގޮވާ އެއްޗެއްގެ އެއްވެސް ނިޝާނެއް ފެނިފައި ނުވާކަމަށް އެމްއެންޑީއެފުން ބުނެފިއެވެ.

އެމްއެންޑީއެފުން ބުނީ، މިއީ ގޮވާ އެއްޗެއްގެ ސަބަބުން ހިނގި ޙާދިސާއެއް ނޫންކަން ސިފައިން ބެލި ބެލުމުން އެނގިފައިވާ ކަމަށާއި، އިތުރު ނުރައްކަލެއް ނެތްކަން ކަށަވަރު ވެފައިވާ ކަމަށެވެ. އެހެންކަމުން ސީން ވަނީ ފުލުހުންނާ ޙަވާލުކޮށްފައެވެ.

ފުލުހުން ވެސް ވަނީ މި ޙާދިސާގައި އިވިފައިވަނީ ނުރައްކާތެރި އެއްޗެއް ގޮވުމުގެ އަޑެއް ނޫންކަން އެމްއެންޑީއެފުން ފުލުހުންނަށް ޔަޤީން ކޮށްދީފައިވާކަމަށް ބުނެފައެވެ.

އާއްމުކޮށް ނުރައްކާތެރި ހާދިސާ އެއް ހިނގާފާނެ ކަމުގެ ބިރު އޮތް ނަމަ މުލީއާގެ ފަދަ ސަރުކާރުގެ އިސް ވެރިން އުޅުއްވާ އިމާރާތްތަކާއި ގްރީންޒޯންގެ ސަލާމަތީ ކަންކަން ވަރުގަދަކުރެއެވެ.